以深海水底世界探險為題材嘅《Subnautica》（深海迷航），因為遊戲質素、玩法等各方面都做得好嘅關係，成功吸納一班 Fans，之後推出嘅續作《Subnautica: Below Zero》雖然仲係搶先體驗階段，但係已經得到超過三萬條「極度好評」評價，而呢個版本下星期就會推出主機版，係時候一齊深潛！

《Subnautica: Below Zero》由 Unknown Worlds Entertainment 製作，係一款水下生存冒險遊戲，採用第一身視點，開放世界。遊戲講述為咗尋找失蹤嘅姐姐，玩家返到行星 4546B，並再次挑戰潛入廣大嘅水底世界以及艱險嘅雪山中冒險，同時潛伏於深處嘅神秘生物正對你虎視眈眈。到底以前有無人黎過呢個星球？黎呢度嘅原因？種種奧秘等你發掘。

本作係一款生存遊戲，自然要滿足基本維生要素，即係要食野飲水，不過就唔難解決，因為本作更側重於「探索」。遊戲最基本流程係製作「掃描器」同「建造槍」呢兩件道具，前者係幫你掃描星球上各種未知生物，從中可得到各種道具、載具、家具製作圖。有圖樣之後就可以用「建造槍」製作水中基地、設施等等，再之後就可以製作載具前往深海探索。

喺呢隻遊戲入面，水底嘅世界做得非常細緻，較淺地區各種水下生物、陽光穿過水面嘅環境光都非常瑰麗。再下面嘅深海就有伸手不見五指嘅黑暗、怪異嘅光芒、外型奇特嘅生物再加上可怕嘅聲音，處處滲透住未知嘅恐怖，果種氣氛甚至有人話呢隻水底版嘅《生化危機》。今集仲要有埋雪山場景，自然有更多未知嘅危險等待大家。

另外喺 PS5 版本嘅《Subnautica: Below Zero》將會利用 DualSense 嘅觸覺回饋系統，加強玩家使用工具同載具時所接收嘅視覺、聽覺聯繫，會因應頻率震動，配搭遊戲中嘅畫面將會令玩家更加投入。

《Subnautica: Below Zero》家用機版本預計於 5 月 14 日推出，對應平台為 PS4、PS5、Xbox One、Xbox Series X|S，購買 PS4 及 Xbox One 版本將可免費升級至新世代版本，而購買上集《Subnautica》PS4 及 Xbox One 版本同樣可升級至新世代版本。