【遊戲新聞】《Cyberpunk 2077》遊戲設計總監被投訴職場欺凌・已確定會正式離職 CDPR

 

於 CD Projekt Red 任職超過 17 年嘅資深高層員工 Konrad Tomaszkiewicz 宣佈將會正式請辭,原因涉及職場欺凌。

Konrad 進入 CD Projekt Red 後由低做起,由測試員慢慢升職到遊戲開發總監,曾經協力開發歷代《Witcher》遊戲,更為《Wither 3: Wild Hunt》嘅遊戲總監、以及《Cyberpunk 2077》嘅發展總監及設計總監。

 

Konrad Tomaszkiewicz

 

不過,根據外媒 Bloomberg(彭博)報導,Konrad 早前因為涉及職場欺凌事件,儘管當事人極力否認,仍然被逼接受為期一個月嘅調查。調查過後,雖然認為 Konrad 並無惡意進行職場欺凌,只係 Konrad 亦表示對於是次事件感到灰心及失望,因此決定辭職,離開任職超過 17 年嘅 CDPR。

Konrad 表示自己請辭已獲公司董事局批准,同時為自己嘅工作態度令到部份員工感到痛苦而感到遺憾。據報,有員工表示在開發遊戲期間,與 Konrad 共事會感到恐懼、壓力、不安,因而發生今次嘅調查事件。

Konrad 目前亦未有分享自己對未來嘅事業發展,只係承諾自己會反思日後與他人共事嘅態度,希望能夠有所進步;CDPR 則拒絕回應是次事件。

 

 

Konrad 多年付出,對於令 CDPR 打入一線遊戲公司行列可謂功不可沒;所以作為公司中流砥柱嘅 Konrad 是次離職,或者會對 CDPR 未來發展更為雪上加霜。

事關備受期待嘅作品《Cyberpunk 2077》於 2020 年 12 月推出之後表現不如預期,唔單止畫面表現差勁,遊戲內容亦與一直對外公開嘅描述有所分別,甚至一度出現無法在主機上運行嘅情況,導致 Sony PlayStation 曾經將遊戲從 PS Store 上下架,而各大平台供應商亦要不斷處理玩家嘅退款要求。唔少玩家形容《Cyberpunk 2077》係「欺詐」,導致投資者對於 CDPR 極為不滿,公司股價更跌至兩年來嘅新低。

 

 

CDPR 旗下嘅 GOG 電腦遊戲平台,亦因為「尊重中國網友意見」而出爾反爾,拒絕上架台灣赤燭遊戲工作室《還願》,呢個甚有政治色彩嘅決定,令到唔少國際玩家都深表不滿,一度出現抵制 GOG 嘅情況。

公關災難未解,人才卻一個一個流失,例如《Witcher 3: Wild Hunt》製作人 Stan Just 亦已經先一步離開 CDPR,自己另起爐灶開新工作室「Covenant.dev」,首隻新遊戲《Gord》更會於 2022 年正式推出,發展備受關注。CDPR 曾經係「神臺級」遊戲工作室,經歷呢年來嘅種種事件,於玩家心目中嘅好感同評分自然大跌。

到底 CDPR 未來發展會係點?《Cyberpunk 2077》又是否能夠如承諾一樣,會更新到盡善盡美,以及成功提供多人遊玩版本?有新消息會再為大家報導。

 

神婆

神婆 為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章