【試玩感想】動作爽快難度中等的日系 ARPG《SCARLET NEXUS 緋紅結繫》對應次世代主機畫面表現優良

 

Bandai Namco Entertainment 全新力作《SCARLET NEXUS 緋紅結繫》早前舉辦媒體試玩會,編輯部榮幸獲邀試玩遊戲嘅部份篇章,以下將會同大家進行無劇透嘅簡短分享。

《緋紅結繫》為一隻第三視點、單人遊玩嘅科幻動作遊戲。玩家於遊戲中飾演「怪異討伐軍」嘅一員(可選男或女主角),以類似超能力的「腦力」配合戰鬥去保險市民安全。(介紹按此

 

 

作為一隻針對次世代主機機能而開發嘅遊戲,《緋紅結繫》嘅畫面表現優良,場景設計及材質表現都頗為細緻,例如係富有未來感嘅日本街道,都見證住開發團隊的心機;同時用家界面及 UI 設計時髦,簡潔易用,就算本身為動作遊戲新手,相信都不難 Pick up 遊戲嘅各種系統。

 

 

遊戲為一隻 ARPG,除了主線劇情,亦會在各個地區接到支線任務,而任務內容大部份都有戰鬥元素。戰鬥係遊戲中非常主要嘅一環,所以編輯部於試玩時,都分別以「簡單」「普通」「困難」三種難度,分別參與過各種小怪戰或頭目戰,去感受各種難度下嘅戰鬥分別。

戰鬥難度分野係明顯的。難度的分別,不只限於敵人的血量以及攻擊強度,也包括了敵人進行攻擊的頻率以及招式變化,不過遊戲整體難度比起同公司另一作品《Code Vein》(同樣由 God Eaters 團隊成員參與開發)而言簡單不少。

 

 

遊戲固然講求玩家反應與操作技巧,不過玩家亦可以於遊戲中靠完成支線等等,去加強自身裝備、配件,以及強化「技能樹」,令到自身能力更為完善。

戰鬥裡面需要配合「念力」去控制周遭物品去攻擊敵人,設定與感覺近似白金工作室於 2019 年推出嘅 NS 平台對應動作遊戲《Astral Chain(異界鎖鏈)》,不過當時《Astral Chain》視點做得麻麻,動作亦較為生硬;《緋紅結繫》於「念力」部份就好似一隻 Upgrade 版嘅《Astral Chain》咁樣,爽快感大為提昇,亦無左視點遠近卡住嘅問題。

 

 

雖然為單機遊戲,不過遊戲裡面玩家可以隨意轉換同行嘅伙伴角色,而每個伙伴都有獨特嘅技能,有啲係輔助系能力,例如角色「紫電里特」嘅技能就係「放電」,可以幫你短時間麻痺敵人;又或者角色「鏡花依登」技能為「複複製」,可以理解為類似影分身之類嘅攻擊系技能。如何搭配隊友嘅能力,去進行最具傷害性嘅連攜效果,都係《緋紅結繫》戰鬥裡面嘅挑戰之一。

 

 

編輯部試玩過後對正式版增加左唔少期待,假如你都想試玩感受遊戲手感,請留意以下資訊。Bandai Namco 已經宣佈會推出《緋紅結繫》嘅繁體中文版試玩版,詳細如下:


Xbox Series X|S|One 玩家
:2021 年 5 月 21 日 00:00 開始
PS4|PS5 玩家:2021 年 5 月 28 日 00:00 開始
Steam 版玩家:暫未有試玩版日子公佈

 

試玩版為正式版抽出黎嘅部份篇章,所以進度唔可以帶落正式版裡面;不過,玩家於試玩版中,可以分別試用男主角「結人 皇」及女主角「重 蘭德爾」不同嘅攻擊風格以及故事視點。完成試玩後,於正式版中亦可獲得相應特典及強化道具。

「結人 皇」擅長使用刀進行近戰攻擊。
在體驗版中,角色「花火」「魯卡」「鶇」「蓋曼」將作為隊伍成員,分別使用「點火」「瞬間移動」「透視」「硬質化」四種能力與玩家一同戰鬥。

 

 

「重 蘭德爾」擅長使用苦無進行中長距離戰鬥。
在體驗版中,「紫電」「嵐」「陽炎」「鏡花」將作為隊伍成員,分別使用「放電」「超高速」「透明化」「複製」四種能力與玩家一同戰鬥。

 

 

《SCARLET NEXUS 緋紅結繫》正式推出日為 2021 年 6 月 24 日,對應平台為 Xbox One|Series X|S、PS4|5 及 Steam。

 

神婆

為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章