《動物之森》每次推出都引到非常多人入坑，特別係上年推出嘅 Switch 版風頭更加係一時無兩。遊戲玩法受歡迎，自然會引來其他廠商效法，即將進行搶先體驗嘅遊戲《Hokko Life》就係一款極有動森味道嘅遊戲，並加入自訂傢具系統，令無 Switch 嘅玩家都可以體驗下動森嘅感覺。

《Hokko Life》由 Wonderscope Games 開發，係一款悠閒社區模擬遊戲。玩家會去到一個叫做「Hokko」嘅僻靜小鎮，利用你嘅鐵鎚、油漆，為所有新朋友設計、建造、裝飾房屋，將呢度變成一個受歡迎嘅迷人鄉村小鎮。

遊戲中玩家可以自由地同所有動物交流，同樣要伐木拎木材、去礦山採礦，再加工製作成各種材料，仲有捉蟲釣魚、農作等，基本上喺《動森》入面有嘅野佢都有，而且動物做型都算可愛。當然佢亦都唔係照抄，《Hokko Life》最大嘅特色就係佢嘅自訂傢具系統，利用內置嘅 3D 設計工具可以對細節進行編輯，當中包括顏色、大少、材質等等，非常全面。順帶一提係呢隻遊戲入面傢具係可以打斜擺放的。

《Hokko Life》將會於 6 月 2日進行搶先體驗，對應平台為 PC Steam。