【遊戲感想】全新人設及故事切入點《戰國無雙 5》反樸歸真動作爽快的無雙佳作

 

相比《真三國無雙》系列,我更加熱愛光榮另一皇牌 IP《戰國無雙》。系列作於 2004 年首次於 PS2 平台上面推出,無論係留有一頭烏黑長髮嘅明智光秀、抑或「第六重天魔王」織田信長,相信呢啲常駐角色嘅固有形象,多年內一定已深入民心。

回顧返《戰國無雙》系列近年發展,對上一次推出正傳《戰國無雙 4》已經係 2014 年嘅事,後來雖然有推出過加強版以及 DLC,亦曾於 2017 年推出過外傳性質嘅《戰國無雙~真田丸~》,不過嚴格黎講,今次嘅《戰國無雙 5》已經距離上集正傳有 7 年時間了。

 

 

對於鍾意玩《戰國無雙》系列嘅朋友黎講,系列作發展到後期,都有出現過「遊戲只係不斷加角色」「換湯不換藥」等等嘅評語,所以今次推出嘅《戰國無雙 5》,可以話係非常脫胎換骨嘅一集,無論係人物角色設計、性格、故事切入點、去到系統方面,都有住非常多樣嘅改變。

雖然角色設計同埋畫面風格改變,令到唔少老 Fans 於遊戲公佈初期大表「不習慣」;但係,有所變化其實亦為一件好事,畢竟一直希望遊戲可以有所革新、改變嘅,正正係我地玩家。

 

 

作為一隻「無雙」遊戲,《戰國無雙 5》慶幸地並未步上《真三國無雙八》嘗試挑戰「開放世界」嘅後路,而係反樸歸真地為玩家帶黎「一騎當千」嘅感受。不過,遊戲並非一味「斬斬向前衝」,《戰國無雙》嘅好玩之處,在於戰役裡面會同時出現好多唔同任務,令到戰事更加緊湊。

 

右下角會顯示當前出現的任務

 

今集武將們可以更換武器種類,例如織田信長初始武器係「大太刀」,但係玩家可以按喜好,或者根據武器力量而去為武將更改武器;而除左武將自身嘅等級,仲有技能樹需要點數解鎖;點數係全角色共同使用的,所以要點樣分配能力、集中升級邊個角色都要玩家自己考慮。

 

每個角色都有自己技能樹

 

玩家亦需要注意武器慣用度、武器本身嘅等級及技能。與以往集數一樣,遊戲裡面有道場、鍛造所等等設施,玩家可以收集素材去為設施升級。

除咗普攻連技變化、以及無雙奧義等常見招式,今集亦加入左「閃技」。每個角色都有固有閃技,唔同武器亦有既定閃技,當中有加攻、加速、加防;亦有一啲係可以助玩家突破敵軍嘅強力技能。閃技使用後需要冷卻時間,但絕對係戰場上面有力嘅小幫手。

 

「閃技」可於出戰前設定;戰事中會顯示於左下方

 

素材可以於戰事裡面取得,亦可以進入主線以外嘅「堅城模式」裡面刷關取得。「堅城模式」係一個類似守點嘅小型戰事,每一場都可以自選兩位武將上場,戰事裡面則會出現隨機任務,玩家完成任務數及斬殺數越多,最後戰事評分就會越高,從而獲得更多素材;而同時上場嘅武將會累積「好感度」,好感度升爆之後則會見到兩位武將之間嘅特別場景劇情。

 

 

至於人設上面嘅改變,遊戲並唔係為改而改。與前四代多以「武田信玄|真田幸村」作為故事主軸唔同,《戰國無雙 5》今次主要以織田信長以及明智光秀嘅故事作為切入點,由織田於美濃嶄露頭角開始說起,從而慢慢再帶出羽柴秀吉、德川家康等人嘅故事。

假如玩家本身唔熟悉戰國歷史,或者係從來無接觸過《戰國無雙》系列嘅話,今次《戰國無雙 5》嘅劇本推進方式,配以動畫描寫,令到各段歷史故事變得更易為人理解。

 

 

比較有趣嘅係,玩過以往《戰國無雙》嘅玩家,相信都會對於織田信長嘅故事(桶狹間之戰~本能寺之變)相當熟悉;今集則會加入明智光秀嘅故事線,以佢嘅角度同時去雙線了解戰國當時諸國亂鬥嘅情況。於正史裡面,「本能寺之變」為何會發生,真正原因始終未有統一說法,到底《戰國無雙 5》會點樣去演繹呢段故事,亦係作為 Fans 嘅我非常期待嘅內容之一。

 

本能寺之變

 

其次,過往嘅《戰國無雙》人設並無按照角色嘅年紀去塑造,例如德川家康剛剛登場時,已經係一個光頭武士頭中年發福嘅叔叔;雖然織田信長・羽柴秀吉・德川家康一直並稱為「戰國三英傑」,但係事實上,德川家康比起織田信長要年輕十幾年,所以《戰國無雙 5》裡面嘅德川首次以「塔矢亮妹妹頭」嘅少年身份登場,對於老玩家黎講視覺上或者好違和,但係是次人設先係最符合史實;織田信長以及明智光秀更有細分為「青年期」及「壯年期」兩個外型,非常仔細。

題外話:是次織田信長聲優「島崎信長」,好似當年正正係憧憬明智光秀聲優「綠川光」而發奮入行的,是次二人可以於遊戲中「命運式共演」,對於聲優控嘅朋友或者都係另外一種吸引力。

 

 

除此之外,今集嘅登場角色同以往頗有分別,例如常駐角色「森蘭丸」或者係「真田幸村」呢啲角色似乎未會登場;但係新增左一啲新臉孔,例如係織田信長弟弟「織田信秀」、今川義元姪女暨德川家康首任夫人「瀨名」等等(按此看今集登場角色)。

 

 

部份角色一覽

 

至於以往曾經出場嘅角色,亦於故事或者人物性格上面有新嘅構成,例如「濃姬」由以往嘅妖艷御姐,變成大和撫子式嘅年輕少女、今川義元由以往嘅踢波怪叔叔,變成今集嘅自大霸氣領主(而且佢唔再踢波,變成遊戲序盤嘅強敵!)。以上嘅變化都為系列帶黎新鮮感,但係改動亦唔見得突兀。

 

 

整體而言,《戰國無雙 5》可以話係非常脫胎換骨嘅一集,不乏無雙系列嘅樂趣之餘,亦都努力喺既有框架入面尋求變化。作為《戰國無雙》系列忠粉嘅我,對於今集嘅革新同變化係全盤收貨的,希望玩家亦都同我一樣,可以於呢集新作之中搵到新嘅樂趣。

 

 

《戰國無雙 5》於 2021 年 6 月 24 日推出,對應平台包括  Xbox One|Series X|S PS45 Switch 及 PC Steam;當中 Xbox 及 Steam 為數位版本。

 

 

 

神婆

為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章