【遊戲介紹】高爾夫球冒險遊戲 《Golf Club: Wasteland》一個世界滅亡後於地球打波的故事

世界滅亡同埋打高爾夫球好似九唔搭八,但係充滿創意嘅遊戲人總會諗到方法將兩者拉埋一齊。預計今年上市嘅《Golf Club: Wasteland》,就係關於一個喺世界滅亡之後,重返地球打波嘅故事,一睇就知唔簡單啦!

 

 

《Golf Club: Wasteland》由 Demagog Studio 開發,係一款冒險解謎遊戲。遊戲設定於世界滅亡後,有錢人已經移民晒去火星。為咗解悶,呢班有錢人就將廢棄嘅地球變為高爾夫球場。玩家所扮演嘅主角就係其中一位火星公民,回到地球就係為咗打波,並喺打波過程中了解過往地球上嘅故事。

 

 

 

大家印象中嘅高爾夫球場應該係綠油油一片,喺呢隻遊戲入面嘅高爾夫球場就變為荒涼嘅土地、廢棄購物中心、崩塌博物館等,遊戲過程中亦會有分支選擇,會有唔同嘅場景玩,仲有機會遇見適應破壞環境後嘅變異動物。喺遊玩每個關卡每個場景中都會感受到過往地球故事,加上遊戲背景播放嘅電台節目,喺歌曲中不時加插諷刺現代人生活方式以及對舊世界美好嘅回憶,香港人玩真係特別有 Feel。

 

 

遊戲提供三種不同模式,有細味劇情嘅「故事模式」,有需於指定桿數內完成,著重技巧及富解迷要素嘅「挑戰模式」,仲有超高難度零出錯嘅「鐵漢模式」,玩家可根據自己技術同喜好選擇。

 

 

《Golf Club: Wasteland》預定於 2021 年 8 月推出,對應平台為 Xbox One、PS4、Nintendo Switch、PC Steam & Epic Games Store。另外 Steam 上已經有試玩版免費下載,並支援繁體中文。

五木

動漫電玩宅,極愛金田一系列,擅長動作及策略遊戲

追蹤

更多文章