【遊戲介紹】大師級團隊模改 《Dark Souls: Nightfall》全新故事地圖戰鬥系統今年推出

From Software 新作《Elden Ring》(艾爾登之環)下年年頭就會推出,但係《Dark Souls》系列留下唔少未解謎團就完結,自然令 Fans 們充滿不捨,所以 Fans 們就決定官方唔出自己出。由一班 MOD 界大師組團製作嘅大型模改《Dark Souls: Nightfall》日前出咗宣傳片以及實機戰鬥影片,整體質素甚高,今年年尾有得玩!

 

 

《Dark Souls: Nightfall》由 AinTunez、Grimrukh、Meowmaritus 等模界大師組團製作,由 2019 年計畫,舊年開始組團開工。根據團隊對遊戲嘅介紹,遊戲基本上使用《Dark Souls》引擎及相關嘅材料,但係由於有全新嘅故事、新角色(有語音)、新支線任務、新 Boss 及新地圖(主要由現有作品構建),所以屬於全新嘅魂系遊戲,佢哋更稱之為 Fans 製作嘅續集。

 

 

日前釋出嘅宣傳片有戰鬥場面、Boss 展示,最後更出現一座明顯未整好嘅城堡,相信係可探索嘅新場景。另外佢地仲有放咗條 18 分鐘嘅遊戲展示片段,片中基本地喺地圖進行探索,展示新嘅戰鬥系統,速度明顯比起原版較快,而且食咗「人性」之後傳統嘅迴避動作「翻滾」變成快速閃身,個人對呢個改動就唔係幾鍾意,因為唔夠「魂」。影片最後有頭目戰,對決「Blistering Demon」,Boss 招式及外型設計幾有原版嘅味道。

 

《Dark Souls: Nightfall》現時仍處於開發階段,目前嘅畫面、特效、模組等等都與完成版有所分別。遊戲預計於今年 12 月 21 日上線,安裝此模改嘅玩家需擁有 PC 版《Dark Souls Remastered 》(黑暗靈魂 重製版)。

五木

動漫電玩宅,極愛金田一系列,擅長動作及策略遊戲

追蹤

更多文章