【遊戲感想】劇本極為出色越玩越精彩《緋紅結繫》絕對係今年值得推薦的日系 ARPG 之一

 

Bandai Namco 於 2021 年 6 月 24 日推出嘅《Scarlet Nexus(緋紅結繫)》,絕對係今年極為出色嘅日系 ARPG 作品。

《緋紅》作為一隻全新 IP,當然有唔少可以改善嘅地方,但係以整體而言,遊戲嘅劇本、人設以及人物關係、動作畫面呈現、以及世界觀氛圍,都表現出色,係一隻越玩越有味道嘅 RPG 遊戲。

於《緋紅》嘅世界入面,玩家飾演「怪伐軍」,去對抗世界各地出現嘅怪物「怪異」。故事分為女主角「重」篇,以及男主角「結人」篇,兩位角色以唔同視點去推進故事。如果你以為故事只係「飾演怪伐軍,打倒敵人,打完大佬,最後大團圓跳起 Yeah」,咁你就大錯特錯。

 

 

《緋紅》嘅劇本可以話係遊戲最出色嘅部份之一,有頗多轉折,亦有一定程度嘅胃痛級便當。雖然遊戲裡並無分歧選項,只不過,以「重」或者「結人」身份去經歷呢個故事,都有著角度迴異嘅發展,所以即使最後故事主線結局係一樣,但係用兩位角色開始遊戲嘅話,對於結局嘅體會亦都會相當唔同。

故事係皇道的,例如係角色會隨住故事而成長,團隊互相扶持彼此,最後解決陰謀,雨過天清……呢種故事發展都算係皇道嘅 RPG 劇本走向;不過,劇本裡面埋藏住各種轉折,世界觀亦都頗為宏大,所以劇情發展一定會令玩家非常投入。

 

 

其次,要製作一隻出色的 RPG 遊戲,你嘅團隊|伙伴亦都好重要。《緋紅》於所有角色上面都有住深刻而立體嘅描寫,眾人性格與故事各異,但係隨住遊戲時間越耐,玩家亦會置身其境一樣,同你嘅伙伴們建立起真切嘅牽絆。

工作室於「團隊牽絆」呢度落左好多功夫,同行角色與「重」以及「結人」都會有完全唔同嘅「牽絆故事」,連送禮物比啲角色,都會因為「重」及「結人」兩人性格嘅不同,而會提供唔同類型嘅禮物,呢啲部份絕對體現工作室嘅用心。

 

角色「鏡花」嘅特殊能力係「分身」:於基地中會見到佢叫分身出黎幫自己按摩!!好羨慕!

熱愛吉祥物「吐吐神」的「結人」:送完攬枕比佢就日日攬住唔起身

 

當然《緋紅結繫》有唔少可以改善嘅空間,例如打擊感。遊戲裡面,玩家需要活用自己以及隊友嘅各種「超腦力」去進行戰鬥,亦可以操作附近嘅物品,去對敵人進行強力猛攻。不過遊戲裡面嘅「手感」就似乎未有充份反映各種攻擊方式嘅觸感分別,直白地形容的話,遊戲嘅打擊感比較「脆」,唔夠立體。

 

不過戰鬥畫面真心華麗,從來無 Lag 機 Drop Frame(我用 Xbox Series X)

 

不過,多種元素嘅「超腦力」設定其實是很有趣的。動作方面,遊戲有普攻、超腦力加成、伙伴技能等等基本設定,仲有可以理解為「限時無雙」嘅「腦內空間」戰鬥系統。隨住劇情推進、以及玩家不斷解鎖技能樹之後,玩家可以使用嘅動作元素就越多,所以《緋紅結繫》嘅戰鬥可以話係「越後越好玩」,越玩越過癮。

另外要稱讚嘅係遊戲內「怪異」嘅造型。《緋紅》裡面怪物造型由美術家山代政一先生所設計,美艷而扭曲嘅風格,除左係山代先生本身個人設計特色之外,亦都為遊戲美術方面加左唔少分數。

 

 

比較遺憾嘅係配樂方面。可能想強調遊戲裡面嘅「次世代未來感」(工作室形容遊戲是「腦龐克」),因此配樂好多時都會混入大量電子音效,例如喺首個版圖「蘇芳市」嘅音樂「Suoh – The Red Metopolis」,微妙嘅 DJ 捽碟聲作為 BGM 真係唔太好聽。

雖然工作室有用心為每個場景或段落創作獨有嘅「專屬 BGM」,不過多數音樂並唔算入腦(當然有部份都仲係幾好聽的,例如進入遊戲前嘅「Scarlet Nexus」)。

 

 

回顧返遊戲中部份經典劇情,假如能夠創作一首主旋律去貫通整個遊戲,相信會更能夠渲染氣氛。例如《Nier》系列,玩完個 Game,你都仲會清楚記得佢嘅「主旋律」(一代嘅「Ashes of Dreams」、二代嘅「Weight of the World」),而呢首「主旋律」即使有用到唔同嘅 Remix 或者演繹方式,但係都會成為加強遊戲氣氛嘅強大助力。對於熱愛玩日系 RPG 嘅人黎講,配樂都係玩家好重視嘅一環,可惜《緋紅結繫》於呢個部份表現並不算亮眼。

 

 

仲有一點可以改善嘅係支線任務。《緋紅》裡面嘅支線任務比較重覆,全部都係「用某種方式去擊倒幾隻特定敵人」而已,而完成支線後獲得嘅獎勵又唔算特別吸引,所以假如玩家 100% 希望支線全清,除左要進行二周目遊戲,亦都需要一啲耐性。支線任務呢部份係比較無趣的。

 

 

另外一點題外話

於網路中瀏覽,曾經見到網上留言表示,玩完 Demo 版本、或者見到有遊戲有動畫 OP 之後,就斷定《緋紅結繫》唔好玩,甚至作出「Bandai 嘅遊戲不了」等等嘅意見。

我認為呢啲意見,較為先入為主了。作為遊戲媒體的一員,我並非精於所有遊戲相關知識,但係我對遊戲嘅熱愛,絕對不下於眾多熱心嘅玩家。對我黎講,假如只係因為一間遊戲公司曾經做過唔好嘅作品(例如《New Gundam Breaker 》,或者再激啲《東京喰種》又真係玩唔落嘅…)就會認為「不了」,咁其實都係一種可惜黎。

 

 

例如 Bandai 於 2019 年推出嘅《Code Vein》。《Code Vein》無論係故事或者難度都係一隻表現出色嘅全新 IP,當然遊戲唔係完美,但係我更樂見擁有資源嘅工作室,不斷去推出新嘅作品,同時喺作品裡面作出新嘗試,《緋紅結繫》亦都係其中一隻我認為值得推薦比其他玩家嘅遊戲黎。

 

 

順帶一提,《緋紅結繫》與《Code Vein》嘅製作人同為飯塚啓太先生,而遊戲總監穴吹健兒先生則負責過唔少《傳奇》系列嘅遊戲開發。其實以呢個班底黎講,《緋紅結繫》係有一定信心保證的。

我不擅長為遊戲打分數,但係你問我推唔推薦朋友玩《緋紅結繫》?答案是絕對推薦的。遊戲相信是 2021 年內推出出色的 ARPG 日系遊戲之一。

《Scarlet Nexus(緋紅結繫)》於 2021 年 6 月 24 日推出,對應 Xbox One|Series X|S、PS4|5 及 PC Steam。

 

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章