【遊戲新聞】《Fallout 4》「狗肉」原型牧羊犬去世・Xbox 捐助動物救援機構呼籲領養

 

於《Fallout 4》飾演玩家伙伴嘅德國牧羊犬「Dogmeat(狗肉)」原型 River 於上月離世。

 

 

消息由曾參與開發《Fallout 3》《Fallout 4》及《Fallout 76》嘅 Bethesda 遊戲設計師 Joel Burgess 公佈。Joel Burgess 同時亦為 River 嘅主人。Joel Burgess 於 Twitter 中表示,River 同自己以及開發團隊都有住好深嘅緣份。

唔少遊戲開發工作室都會選用已經受訓嘅前警犬或者電影專用特技犬作為遊戲開發模組,不過佢地遇上 River 之後,認為 River 嘅外表、性格都與佢地心目中嘅模組一拍即合,於是決定改變「Dogmeat(狗肉)」一開始嘅設定,而改用 River 作為模組。

 

 

比較有趣嘅開發故事仲有,原本《Fallout 4》開發團隊已經為「Dogmeat」規劃出一定嘅 AI 系統,亦打算將 River 訓練成佢地想像中嘅模樣;但係,Joel Burgess 表示,後來大家都被 River「收服」,反而係選擇更改設定,於遊戲中加入 River 嘅固有習慣。

玩家如果有印象,或者會記得《Fallout 4》中,「Dogmeat」每行一段路就會回頭確認玩家嘅位置,呢一點其實並唔係遊戲獨有設定,而係 River 本身嘅習慣黎;同時,River 非常樂於與其他人分享自己發現到嘅事物,呢一個元素亦都有加入到遊戲裡面,因此玩家遇到嘅「Dogmeat」,可以話係近乎完全倒模 River 嘅模組黎。River 嘅真實表現,更令佢於 2015 年「The World Dog Awards」裡面獲得「Top Video Game Dog」大獎。

 

 

Joel Burgess 最後表示,雖然 River 嘅離開令到佢同埋開發團隊極為悲傷,但係亦好慶幸 River 曾經以「Dogmeat」嘅形象於遊戲裡面出現,作為玩家嘅伙伴,一直長存下去。

同時,佢又作出呼籲,希望大家「領養代替購買」動物,又呼籲大家有能力嘅,可以考慮捐款予各個動物救援機構;Xbox 轉發左呢個訊息,並領頭向美國其中一個動物機構 Montgomery County Humane Society 捐款美金一萬元整,希望幫到更多有需要嘅動物。。

 

 

《Fallout 4》於 2015 年 11 月 10 日正式推出,為系列作最新嘅正傳作品,非凡劇本以及多元角色互動,令到遊戲成為唔少玩家心中嘅經典作品。《Fallout 4》推出當時對應 Xbox One、PS4 以及 PC Steam 平台,而 Bethesda 被 Xbox 收購之後,遊戲目前正登錄於 Xbox Game Pass 中供會員遊玩,可於 Xbox Series X|S 機種上遊玩。

最後,領養代替購買!領養代替購買!領養代替購買!很重要所以說三次。

 

神婆

為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章