【遊戲介紹】空戰動作策略遊戲 《HighFleet》硬派軍事風格巨艦大砲沙漠決戰

鍾意 Hardcore 軍事風格遊戲嘅朋友留意啦,過幾日就會推出嘅獨立遊戲《HighFleet》相信啱你口味,不但戰鬥系統有街機味,仲有埋育成管理等要素,加上製作人曾經服過兵役,戰場上嘅「臨場感」表達得幾好,令人期待。

 

 

《HighFleet》由俄羅斯開發者 Konstantin Koshutin 製作,佢曾經服過兵役(戰鬥民族兵役!),亦曾經製作極有特式用錘仔打飛行敵人嘅遊戲《Hammerfight》。《HighFleet》係一款空戰動作策略遊戲,遊戲以荒涼嘅後世界末日世界為背景,劇情上則受到科幻小說《沙丘》嘅啟發(九月會有電影上畫)。

 

 

遊戲中玩家將扮演擁有強大軍事力量嘅「Sayadi」特遣隊指揮官,負責調查、資源管理、外交以及建立一支能夠稱霸天空嘅艦隊,所以遊玩時玩家可以同時享受模擬管理及動作戰鬥。另外遊戲仲包含冒險元素,,透過探索「失落嘅預言」去解開隱藏於 Gerato 王國中嘅神秘面紗。

 

 

《HighFleet》核心戰鬥方式比較獨特,以滿載武器嘅巨型艦船打空戰,操作上有一定技巧要求,並唔係盲目地亂撳,講求走位同時要兼顧陣地以及利用敵人弱點等戰術。另外遊戲中有大量船隻零件供玩家設計及升級戰艦,官方保證數量之多足以令玩家有多次重玩嘅價值。

 

 

《HighFleet》預計於 7 月 27 日上市,對應平台為 PC Steam。

五木

動漫電玩宅,極愛金田一系列,擅長動作及策略遊戲

追蹤

更多文章