【遊戲介紹】大文豪以拳頭交流 《Write ‘n’ Fight》當莎士比亞遇上海明威與狄更斯

製作遊戲只要有創意,就凡事都有可能。由獨立遊戲團隊 AVOS’ 製作嘅格鬥遊戲《Write ‘n’ Fight》,集結古今中外文豪作家,唔再係用文字交流,改為用拳腳競技,原來除咗孫中山同甘迺迪,就連大文豪都咁好打,To be or not to be, let’s fight!

 

 

《Write ‘n’ Fight》集結多位史上知名作家,包括莎士比亞(William Shakespeare)、查爾斯·狄更斯(Charles Dickens)、洛夫克拉夫特(Howard Phillips Lovecraft)、托爾斯泰(Leo Tolstoy)、杜斯妥也夫斯基(Fyodor Dostoevsky)、海明威(Ernest Hemingway)於戰場上以拳腳對決。根據官方介紹每位角色都有各自獨特嘅技能,例如洛夫克拉夫特手指就好有「克蘇魯」味。

 

 

暫時未知實際系統如何,不過係影片中見到角色間嘅招式就並非以《街霸》、《拳皇》一類平面格鬥遊戲以極鮮明嘅方式表達(即係波動拳、大蛇薙呢類招式),反而比較近似《鐵拳》咁,以拳腳組合作為招式(多數都係拳腳加少少特效),打擊感亦都稍遜,現階段似搞笑遊戲多於一款真正嘅格鬥遊戲。

 

 

《Write ‘n’ Fight》預計於今年 11 月推出,對應平台為 PC Steam。根據開發者 Twitter,未來會持續推出新角色,亦會包含亞洲地區嘅文豪,唔知有無機會見到杜甫大戰太宰治呢?

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章