【遊戲介紹】極好評動物大逃殺 《Super Animal Royale》用可愛動物互相廝殺免費遊玩

今時今日大逃殺類遊戲已經多到嘔,不過就大多數都係真實系+立體射擊遊戲,轉下口味玩可愛風平面射擊又幾唔錯。之前搶先體驗咗勁耐嘅《Super Animal Royale》,一直都 Keep 住有極度好評評價,早排終於正式推出(1.0 版本),仲要出埋落各大主機平台,極適合一班朋友 or 一家大細玩!

 

 

《Super Animal Royale》由 Pixile Studios 開發,係一款平面大型線上動作射擊遊戲,最大支援 64 人同場決鬥。同一般大逃殺遊戲一樣,玩家將跳傘到野生動物園廢墟中,落地之後可以劈草叢、入建築物尋找槍支、炸藥等道具,仲有載具同空投補給品。隨時間經過可活動範圍將減少(縮圈) ,不過喺呢隻遊戲外面個圈係超級臭鼬鼠臭屁味,因為太臭所以要避開,好過癮。

 

 

由於係平面射擊,所以戰鬥中好易見到敵人位置,不過唔代表遊戲易玩。因為操作簡單,變相更著重走位,否則極容易走入兩班敵人之間被圍死。隨住玩嘅次數上升,玩家可以解鎖全新服裝、墓碑、死亡爆炸、武器外觀、跳舞動作等,幫各種動物扮靚靚,唔打得都睇得!

 

 

《Super Animal Royale》已經推出,對應平台為 Xbox Series X|S、Xbox One、PS5、PS4、Nintendo Switch 及 PC Steam、MacOS,免費遊玩,之後仲會有 Google Stadia 同 GeForce Now 版本。

五木

動漫電玩宅,極愛金田一系列,擅長動作及策略遊戲

追蹤

更多文章