【遊戲介紹】台灣製高質素新作 《Asterigos》多種戰鬥風格挑戰古代群魔

台灣製作遊戲越黎越有水準,而今次介紹嘅新作《Asterigos》就更令人眼前一亮。日前公開嘅遊戲宣傳片中所見,不論美術定係動作都甚有外國大作嘅味道,加上豐富嘅戰鬥風格,絕對係吸引力十足!

 

 

《Asterigos》由台灣獨立工作室 Acme Gamestudio(艾可米遊戲股份有限公司)開發,係一款動作角色扮演遊戲,採用第三身視點,Unreal Engine 4 製作。遊戲發生於架空奇幻世界 – 隕落嘅星光之城「亞弗斯」,主角係希爾妲,隸屬於北風軍團嘅女戰士,為咗尋找失蹤父親而冒險進入到此地。佢將會喺呢度發掘出城市衰落嘅真相,並面對大量分歧點,而每個選擇都會影響整個國度嘅命運。

 

 

遊戲舞台「亞弗斯」由市中心及森林、礦山、地下水道等地區所組成,各地區均可自由探索,而喺呢啲地方當然有各式各樣嘅怪物等待你(仲有解謎元素)。影片所見,有被咀咒嘅士兵、狼人、鷹身女妖、巨石魔偶、各種巨大 Boss 等等,而場景及美術都有濃厚嘅古典希臘味道,睇落就同 Ubisoft 嘅《芬尼克斯傳說》有啲相似。

 

 

本作最大特色相信係多變而豐富嘅戰鬥系統。遊戲中玩家將有劍盾、雙刃、短槍、大錘、法杖、護腕六大武器供使用,每種武器都有自己風格、能力、天賦技能,例如劍盾主打防反、雙刃主打快速攻擊高速切入、法杖放魔法等等,加埋各武器技能混合使用就更好玩,例如用鎖鏈連結敵人再快速切入,然後用冰魔法轟飛敵人,用槍擊倒等等,數十種招式互相配合,玩法係極之多變,不過現時所見打擊感有點弱,希望正式版有所改善。

 

 

《Asterigos》預計於 2022 年春季尾段上市,對應平台為 PS5、PS4 及 PC,對應繁體中文。

五木

動漫電玩宅,極愛金田一系列,擅長動作及策略遊戲

追蹤

更多文章