【遊戲介紹】越驚就死得越快 《Amnesia: Rebirth》無戰鬥能力只能逃跑恐怖冒險解謎

今次介紹嘅作品《Amnesia: Rebirth》其實早喺舊年十月已經推出,最近開發廠商為旗下遊戲進行為期一週特價,自然要趁呢嗰機會同大家介紹下。《Amnesia: Rebirth》係大受好評嘅《Amnesia The Dark Descent》續作,遊戲中並無任何戰鬥能力,加上近乎令人窒息嘅恐怖氛圍,得到外國多個媒體給予高分評價,非常值得特價入手。

 

 

《Amnesia: Rebirth》獨立遊戲團隊 Frictional Games 開發,係一款恐怖冒險解謎遊戲,採用第一身視點。玩家將扮演女主角冒險家 Tasi Trianon,因不明事故喺阿爾及利亞沙漠中昏迷,醒返後發現已經過咗幾日,而且失去記憶,然後就梗係搵返記憶之旅啦。

 

 

冒險過程中,玩家絕不孤單,因為有以恐懼為食物嘅怪物伴隨,所以 Tasi 要 Keep 住摒息,並同自己講「唔好驚」,而玩家就要喺呢個咁緊張有壓逼感嘅情況下,喺昏暗環境中探索解題。遊戲中照明手段得幾種(例如火柴),亦無任何戰鬥能力,玩家只能夠躲避怪物以及超自然力量,並保持理智值唔好跌破底線。

另外本作有極貼心嘅「冒險模式」,喺呢個模式下周遭環境將會更光亮,同時移除驚嚇元,即使怕玩恐怖遊戲嘅玩家都無問題,可以專心解謎。

 

 

現時 Frictional Games 做緊為期一週特價,除咗有壓倒性好評嘅前作《Amnesia: The Dark Descent》,更有另一款同樣有壓倒性好評,探索海底嘅恐怖冒險遊戲《SOMA》,連埋今集全套買晒都只係 HKD $100,可謂超級抵玩。

 

 

《Amnesia: Rebirth》已經推出,對應平台為 PS4、PC Steam 及 Epic Games Store。

五木

動漫電玩宅,極愛金田一系列,擅長動作及策略遊戲

追蹤

更多文章