日本工作室 DOGICA 宣佈即將推出彈幕式平面射擊遊戲《式神之城 2（式神の城 2）》嘅移植版本，對應平台為 PC Steam 以及 Nintendo Switch 平台，預計於 2021 年 12 月率先發行 PC 版本，NS 版本上架日有待公佈。

《式神之城 2》原為 2003 年推出嘅街機遊戲，後來於 2004 年登錄到 PS2 以及 Xbox 平台上面。玩家於遊戲當中，可於 7 位（及一位隱藏角色）當中選用一位進行操作，每位角色都擁有唔同特殊技能，而攻擊手段包括「普通攻撃」「式神攻撃」以及「特殊攻撃」三種模式，以擊破敵人通關為最終目的。不過，遊戲仲有特別之處，就係玩家擊破敵人時，與敵人身處距離越近，就會獲得 Bonus 分數。

雖然為一隻射擊遊戲，但係遊戲劇本會隨住玩家完成關卡而推進，係一隻另類嘅劇情向故事。每位角色於故事中擔當嘅身份都唔同，因此操作唔同角色遊玩遊戲，亦代表玩家以唔同角度去了解故事發展。

遊戲推出當時已係全語音對應，而且起用聲優陣容吸引，例如男主角「玖珂光太郎」配音為「岸尾だいすけ」、女主角「結城小夜」配音為「堀江由衣」；敵方陣容強敵「アララ・クラン」為「田村ゆかり」、「堀口ゆかり」則為「甲斐田ゆき」等等。遊戲支援二人同時合力戰鬥，依據玩家選用嘅角色組合，戰場上衍生嘅對白內容亦會有所變化。

是次嘅《式神之城 2》並非重製或者 Remastered 版本，進行移植處理工作嘅為當時嘅遊戲製作人「須田直樹」先生。不過移植版本將會加入新模式，比起原有關卡更具難度及挑戰性。

《式神之城 2》移植版本對應平台為 PC Steam 以及 Nintendo Switch 平台，預計於 2021 年 12 月率先發行 PC 版本，NS 版本上架日有待公佈。Steam 版將對應日文及英文界面。