【遊戲介紹】玩完瘟疫玩治國 《反叛公司:局勢升級》挽救戰後國家或做叛軍推翻政府

之前以貼近真實傳染病模型嘅策略模擬遊戲《瘟疫公司》,因為完美還原現實武肺傳播狀況而大受歡迎。由同一團隊開發嘅新作《反叛公司:局勢升級》(Rebel Inc: Escalation)日前終於結束長達兩年嘅搶先體驗階段,正式推出 1.0 版本,今次題材玩治國或推翻政府,相信又會挑起某國人神經。

 

 

《反叛公司:局勢升級》由 Ndemic Creations 開發,係一款政治軍事策略模擬遊戲,支援多人合作或對抗。遊戲中玩家需要幫助飽受戰火蹂躪嘅國家重歸穩定,權衡軍民事務優先順序,以各種方式贏取民心,並小心防範叛亂分子推翻政權嘅策略行動。為咗更接近現實,遊戲借鑒阿富汗局勢,加入現實世界發展條目及平叛戰術。

 

 

現時遊戲中有八處維和區域以及八位獨特治理者,每個地區同人物都各有特色,有抵禦叛軍攻擊、遏制毒品貿易等玩法,而角色亦有增加收取全年預算嘅「經濟學家」、訓練私人傭兵嘅「軍閥」,亦可以玩「走私者」靠黑市賺錢。喺戰役模式下,玩家可實施大型跨域行動,調配資源,並有多達 150 種戰術、地圖特性、叛軍特殊升級條目等等,玩法豐富有趣。

 

 

多人合作模式下玩家可選擇分工合作,同時穩定兩個各自獨立區域,並向隊友輸送士兵及資源,適合向難度挑戰。多人對抗遊戲則可以扮演叛亂分子,以推翻敵對區域政府為目標,同時穩定己方局勢,用返貼地啲嘅講法就係用盡方法叫人唔好捉鬼。

 

 

《反叛公司:局勢升級》(Rebel Inc: Escalation)已經推出,對應平台為 PC Steam,支援繁體中文。

五木

動漫電玩宅,極愛金田一系列,擅長動作及策略遊戲

追蹤

更多文章