超個兩萬個《The Sims 4》玩家正進行聯署，希望 EA 能夠聽取意見，支持性小眾及性別平權，於遊戲當中加入「中性」稱呼。

EA 旗下長青模擬遊戲《The Sims 4》於 2014 年首次推出，當時性別區分為「男性」及「女性」已經惹來性別平權人士嘅不滿。後來於 2016 年時 EA 將遊戲內限制放寬，玩家無論選擇任何性別，模擬市民嘅聲線、行為方式、體格都唔會受到「性別」嘅限制。

EA 表示佢地有留意 LGBT 社群嘅需要，不過 LGBT 社群就認為 EA 反應以及行動唔夠迅速，例如遊戲中依然只得「He｜Him」或者「She｜Her」嘅第三人稱，呢個稱呼係妄顧「變性者（Transgender）」以及「中性人（Non Binary，即不認同自己是男性及女性任一性別的分類）」嘅需要，要求加入例如係「They｜Them」等等較為中性嘅第三人稱。

目前聯署已經有超過兩萬人簽署，而 EA 方面暫時未對聯署作出回應。《The Sims 4》目前已登錄於 Xbox One｜Series X｜S、PS4｜5 及 PC 平台，亦已上架 EA Play｜Xbox Game Pass。