早幾個月出咗一隻評價超級正評嘅獨立遊戲《Death’s Door 》（死亡之門），PC 版甫推出就得到「極度好評」評價，而且大部份外媒都給予接近滿分評價，最勁嘅係上市首週就突破十萬玩家，實力非凡，黎緊將會推出家用機平台，預購的話仲買一送一，勁抵玩。

《Death’s Door 》由雙人開發團隊 Acid Nerve 製作，係一款動作角色扮演遊戲，使用 45 度俯視角度。遊戲中玩家扮演一隻負責收集亡者靈魂嘅死神烏鴉，但係有靈魂小偷將你手上嘅靈魂偷走，為咗奪回靈魂，必需進入不被死亡管轄嘅地去追小偷 ，而喺呢度住有各種怪異扭曲居民，並於路上擊敗異獸與半神，追尋各角色背後故事與大陸秘密。

戰鬥系統與普通動作遊戲大動小異，以近戰作主力、魔法及弓箭輔助、以回避閃躲敵人攻擊，主打跑帶打戰術，節奏明快。另外畫面雖然及唔上大廠作品般精緻，但係美術上落足功夫，以偏卡通童話風配上精心特定嘅場景渲染營造氣氛。例如部分場景如靈魂收集，刻意以灰色為主色去表達員工雖有無盡壽命但悶到裂嘅心態，反之外間雖然生明有限但色彩繽紛，兩者形成強烈對比。

遊戲整體難度唔高，但係會透過不斷死亡令玩家學習成長，擊敗敵人收集靈魂可強化角色能力。頭目設計有特色，攻擊方式同節奏都唔難掌握，只要細心觀察就搵到對應方法，特別係中後期魔法同武器勁咗就更易過關。另外本作地圖及關卡設計有大量需可利用陷阱及機關互動，以之迎敵非常有趣，同時更有為數不少嘅隱藏道路及收集要素，令遊戲耐玩性變高。

《Death’s Door 》Xbox Series X|S、Xbox One、PC Steam 版本已經推出，PS5、PS4、 Nintendo Switch 版本預定於 2021 年 11 月 23 日發售 。即日起玩家可於 PlayStation Store 進行預購，預購的話仲會送埋同樣由 Acid Nerve 製作，擁有「極度好評」評價嘅出道作品《泰坦之魂》（Titan Souls）。