獨立遊戲工作室 Delusional Studio 正在開發《WRONGED US》，為一隻第三視點開放世界驚慄求生遊戲，預計 2023 年推出，對應 PC 以及家用機平台，實際對應機種有待工作室日後公佈。

《WRONGED US》為一隻劇情導向遊戲，玩家飾演的男主角，為了尋找失蹤的同伴而來到了神秘的小鎮。小鎮非常荒蕪，人煙稀少，電線桿上更貼著大量尋找失蹤人口的尋人單張。小鎮上面殘留著少量居民，只係佢地生活得非常神經質及警戒，甚至時刻都會以武器傍身。當中一位居民更叫男主角盡快離開，因為一切已經太遲，若想活命，就不要再追尋下去。

小鎮裡面亦有不少已經失常甚至可怖的住民，例如是背負十字架在路上徘徊的人、在滿佈血塊的廚房裡面烹調的人、甚至一些身體長相異常的人形生物，都對玩家抱有強烈的攻擊性。

玩家於遊戲當中，可以選擇「潛伏閉氣」以避過敵人的攻擊，亦可以於旅程中獲得武器如手槍等等去對抗敵人；遊戲當中更有不少解謎元素，為一隻設定極為豐富的恐怖遊戲。

工作室表示，開發《WRONGED US》時有從《Dark Souls》以及《Silent Hill》兩部作品中取得靈感，例如係遊戲裡面能夠與 NPC 互動以接取支線任務，但係遊戲中唔會顯示地圖、或者提示玩家下一步行動的 UI。玩家完成任務與否，都會對日後的探索造成影響；今日幫過嘅 NPC，他日亦可能會因為你嘅幫助而成為日後嘅敵人等等，都係取材自 《Dark Souls》嘅靈感；至於小鎮嘅氛圍以及遊玩配置，則係取材至經典恐怖遊戲《Silent Hill》。

遊戲目前仍在初步開發階段，大家目前見到嘅遊戲內容，實際上係「一人工作室」開發出黎嘅成果。製作人表示，原本目標係 2022 年推出作品，不過考慮到遊戲品質，最終決定增加開發人手，並推遲到 2023 年再為玩家呈現製成品。

目前遊戲對應機種有待確切公佈，有新消息會再為大家報導。