《熱血》系列陪伴唔少玩家長大，不經不覺已經去到 35 週年，日前 Arc System Works 就正式宣佈  35 週年紀念新作《熱血三國志》日版即將推出同埋黎緊會出中文版。大家熟悉嘅角色會以三國武將身份出現，仲有合作、育成等要素，正！

《熱血三國志》（くにおくんの三国志だよ全員集合！）由 Arc System Works 開發，係一款橫向捲軸動作遊戲。故事背景設定以《三國演義》為藍本，熱血系列主角國夫則扮演猛將關羽，用佢嘅視角體驗亂世生存之道。根據資料，故事模式總共有 6 章，當中包括「黃巾起義」、「赤壁」在內，並且可支援雙人線上或線下合作遊玩。

動作部份同以往《熱血》系列大同小異，不過就加入百烈腳、十字旋風撻等必殺技，儲夠 SP 更有「熱血亂舞」使用。作為三國武將，又點少得計謀，有十種計謀使用，當中嘅「火計」係全畫面高傷害魔法，用黎清場一流。另外玩家喺場上偶然會執到強化裝備，有唔同嘅「獎勵效果」，亦可於商店買技，儲夠經驗值升級仲有得自己加角色屬性點，令到隻角色 Fit 返自己。

故事模式以外，有個叫「三國英雄錄」嘅模式，呢個模式最大支援四人單機同遊，合作打敗陸續出現嘅敵人，挑戰每關最後出現嘅 Boss 過關。對於熟悉《熱血》系列嘅朋友，呢個模式應該係最歡樂的，因為有得打隊友，而呢個亦係一貫系列傳統。

《熱血三國志》Nintendo Switch 日文版預定 12 月 16 日發售，中文版就未有發售日期，對應平台為 PS4、Nintendo Switch 及 PC Steam。