創作出《聖石小子》、《妖精的尾巴》、《Edens Zero》等人氣作品嘅知名漫畫家真島浩，日前喺個人 Twitter 上面發表幾幅圖，內容係由佢親自開發，有《Edens Zero》角色登場嘅全新解謎遊戲。現時真島浩不但正連載《Edens Zero》，更有其他遊戲合作企劃（例如《Gate of Nightmares》），理論上係非常忙的，仲有時間去親手製作遊戲，真正時間管理大師無誤。

該 Tweet 於 12 月 17 日發表，佢自己都講到明係興趣使然下製作嘅業餘作品，附圖所見有《Edens Zero》中蕾貝卡及哈比出現，未知會否有其他作品角色登場。遊戲疑似使用 RPG Maker 製作，玩法係就類似以前逃脫類解謎遊戲，預計明年初完成製作，並免費提供予大家遊玩。

スペースで話題に出た趣味で作ってるフリーゲームです。まだ制作中ですが来年の早い時期には完成しそうです。 pic.twitter.com/0KTPlYP8QN

— 真島ヒロ (@hiro_mashima) December 17, 2021

熟悉真島浩嘅讀者相信都知道佢本人熱愛玩遊戲，舊年都有分享過自己心目中最佳年度遊戲，同時本人亦有參與大量遊戲相關企劃，除咗上面提及 Square Enix 嘅《Gate of Nightmares》世界觀及所有角色設計，單係《Edens Zero》都有兩款遊戲開發中，工作量可想而知，而佢本人不但每日可以瞓夠七小時，仲有時間整埋遊戲，可見「真島浩」其實係一個團隊嘅傳聞屬實。