根據非正式文獻記載，施展鍊金術係需要「等價交換」，亦即係要獻上鍊成目標相應價值嘅事物。日前推出試玩嘅新作《My Lovely Wife》，主角為咗復活亡妻而召喚出魅魔，再打算以佢嘅血肉作為等價交換條件，係一隻融合戀愛、管理、煉金術模擬特色嘅遊戲。

《My Lovely Wife》由 GameChanger Studio 及 Toge Productions 共同開發，係一款的暗黑奇幻戀愛經營模擬遊戲（不過美術就有啲「特別」）。遊戲講述主角 Jake 因為愛妻 Luna 不幸早死，因為一個偶然，收到一封有亡妻筆跡嘅信，內容係要求你為佢進行復活儀式。為咗達成亡妻嘅請求，Jake 不惜一切召喚魅魔，並使用各種手段令魅魔愛上你，再將之獻祭成為適合 Luna 靈魂嘅容器。

雖然復活亡妻係遊戲主線，但係召喚魅魔又並非得一個目的。使用不同材料會召喚出唔同種類嘅魅魔，有各自嘅特徵、性格，玩家可針對能力派佢地去學校學習又或者打工賺取資源。日常則可以同魅魔約會增加好感。有趣嘅係魅魔始終係邪靈黎，突然心情唔好隨時將你殺死，所以主角都要適當地增強自己能力保護自己。

隨遊戲推進，角色能力夠強大之後，就可以選擇繼續同魅魔度過幸福快樂放盪嘅生活，定係狠心殺死魅魔提取精華復活亡妻。由於本作分支極多，根據官方資料有成 42 個結局，相信召喚邊一隻魅魔、各自好感度有多少、對話選項（部分對話選項要達成特定條件先會開啟）、喺咩階段落手都會影響結局，耐玩性甚高。

《My Lovely Wife》未有實際推出日期，但係日前已經放咗試玩版，只要到 Steam 頁面揀「要求存取權」即可下載，支援繁體中文。