大受玩家歡迎，懷舊美式卡通風格動作遊戲《Cuphead》令人眼前一亮，亦都令到更多人重新認識呢種風格遊戲。新作《Spiders Everywhere》同樣係用懷舊美式卡通風格，仲要去盡啲係黑白畫面的，但係畫面精細度絕不馬虎，仲要免費添，Download 咗先算啦！

《Spiders Everywhere》由獨立團隊 Soju and Ink 開發，係一款高難度橫向動作遊戲。玩家將扮演發惡夢嘅 BB「LIL BABY POOP 」，用投擲物去除夢中追殺你嘅蜘蛛，逃出夢境。遊戲整體以懷舊美式卡通風格美術呈現，但係流暢度非常高，伴隨住舊式爵士音樂，遊玩過程相當愉快。

遊戲只有一個難度，但係對一般人黎講係頗難玩的，都幾考反應。另外所有敵人都係以隨機方式配置，每次遊玩都有新體驗，不過都係睇你應對速度為主，練習多啲就過到。

《Spiders Everywhere》現時已於 itch.io 推出，PC Steam 版本就要 1 月 20 日先有得玩，兩者同樣都係免費遊玩。