【遊戲介紹】爽度十足謎之遊戲 《Vampire Survivors》超低配置自動射擊遊戲

《雷電》呢類平面射擊遊戲大家都好熟悉,有龐大怪海嘅無雙類遊戲大家亦唔會陌生,將兩者特色溝埋一齊就係今次為大家介紹嘅謎之遊戲《Vampire Survivors》。畫面極之簡單,需要嘅配置極低(Intel Pentium 4),但唔代表遊戲質素低劣,相反推出短短時間就得到「壓到性好評」評價,最正嘅係遊戲有種神秘嘅魔力令你想一直刷刷刷,毒性甚高。

 

 

《Vampire Survivors》由獨立製作人 poncle 開發,係一款 Rogue-lite 恐怖休閒遊戲。基本操作都係靠 WSAD 控制上下左右移動,武器則會自動攻擊無需額外控制,玩嘅係睇下自己可以喺怪海中捱到幾耐,簡單易明。

 

 

雖然設計簡單,但因為美術及設計非常有《惡魔城》味道,玩起上黎絕不陌生。遊戲有多個角色解鎖,外觀以外起手武器及能力亦有所不同,仲有十字架、鞭、戰斧、飛刀、魔杖、聖經、聖水等多種武器,各自有不同特性,有識自動導向嘅、有來回兩段攻擊判定嘅、有識自動回復等等,部份進階武器甚至要升爆初階武器先會出現,透過成長解鎖及對武器嘅了解搵出啱自己嘅玩法。

 

 

除咗基本嘅怪海,中途更會出現大型 Boss,擊敗佢或者關卡中開啟寶箱可得到輔助道具,殺敵就可以得到魔石,可用於升級解鎖技能或武器。遊戲暫時只係早期 0.2 版本,只有兩關遊玩,不過作者已經講咗未來會追加更多關卡及故事劇情模式,有興趣嘅可以買黎玩下先,HKD $18.00 抵玩到喊。

五木

動漫電玩宅,極愛金田一系列,擅長動作及策略遊戲

追蹤

更多文章