【遊戲介紹】橫向動作冒險遊戲 《The Cub》以華麗跑酷動作逃出人類魔掌

之前我哋介紹過一隻用打高爾夫球去冒險嘅遊戲《Golf Club: Wasteland》,由同一製作團隊開發嘅新作《The Cub》就變為玩橫向動作,不過就唔係《惡魔城》、《洛克人》果類邊行邊打怪嘅玩法,相反係以各種華麗跑酷動作玩「走佬」,完全考驗你嘅控制技術。


《The Cub》由 Demagog Studio 開發,故事講述地球受到大型病毒污染後已變得不適宜人類居住,有錢人全部移居去火星,無能力無錢嘅人就只好留喺地球自生自滅(世界觀設定同《Golf Club: Wasteland》接近一樣)。幾十年後,喺火星嘅人發現地球上出現對病毒免疫嘅人類「Cub」,於是決定派人前往捉拿「Cub」研究,玩家就自然係操作「Cub」喺廢棄地球上逃出敵人追捕,同時喺惡劣環境下與各種生物對抗。

 

 

 

遊戲玩法主要係用各種跑酷動作,例如利用危險植被、進化後嘅野生動物前進,有時亦要解開謎題打開隱藏嘅道路,當然仲要喺廢墟中探索,尋找世界隕落嘅故事與線索等等。另外,因為本作係以 90 年代經典遊戲《森林王子》、《阿拉丁》、《獅子王》等為靈感,加入現代嘅玩法及構思而成,配合懷舊風味嘅音樂以及近九十年代電影嘅美術,玩起上黎有種 Retro Game 嘅味道,但又唔會覺得落伍。

 

《The Cub》發售日期未定,對應平台為 Xbox Sereix X|S、PS5、PS4、Nintendo Switch、PC Steam。

五木

動漫電玩宅,極愛金田一系列,擅長動作及策略遊戲

追蹤

更多文章