【遊戲介紹】多人恐怖冒險新作 《Quarry-Nightmare Summer Camp》近二百個結局取決於玩家的選擇

以製作驚悚冒險遊戲《直到黎明》(Until Dawn)聞名嘅 Supermassive Games,最新作品《Quarry-Nightmare Summer Camp》(獵逃驚魂)繼續用充滿電影感嘅方式講故事,今次仲會有超大量分支,每個分支都會令故事走向有所不同,根據資訊製作團隊準備咗 186 個結局,鍾意呢類作品嘅朋友要留意了。

 

 

《Quarry-Nightmare Summer Camp》由 Supermassive Games 製作,係一款驚悚冒險遊戲,最大支援八人連線共同遊玩,同時提供「電影模式」,你可以好似睇戲咁去欣賞呢款作品。故事描述喺夏令營最後一晚,營地輔導員為大家舉行一場告別派對,本應係歡樂嘅一晚,但係事情向意想不到嘅方向發展,一班青年被血腥嘅獵人追殺,到底最後能否渡過恐怖嘅一夜?

 

 

遊戲玩法同《直到黎明》大同小異,動作部份都係簡單移動同探索,追逐時就以 QTE 決勝負,劇情部份就主要係對話選項。當玩家每做出一個選項都會有相應嘅影響,輕則改變人際關係,重則會令人面臨生命危險。因為選項眾多,就算喺同一場景中玩家可選擇嘅選項亦會因應之前嘅決定而有所不同,新選項亦會影響玩家嘅判斷。根據製作團隊所講,結局有多達 186 個,而呢啲結局並唔係角色間嘅存亡之分,係會有多種變化的。

 

 

《Quarry-Night Dream Summer Camp》預計於 6 月 10 日發售,對應平台為 Xbox Series X|S、Xbox One、PS5、PS4 及 PC Steam,支援繁體中文。

五木

動漫電玩宅,極愛金田一系列,擅長動作及策略遊戲

追蹤

更多文章