【遊戲新聞】揸槍版寵物小精靈 《Palworld》開放世界中瘋狂奴役獵殺寶可夢

我哋上年介紹過,由痴線 Game《Craftopia》果班人做嘅新作《Palworld》,題材係玩《Pokémon》(精靈寶可夢),不過就變得更寫實,可以獵殺、奴役啲小精靈。日前就正式發表最新試玩片展示各種要素,最正嘅係見到角色拎起槍射殺小精靈,配合可愛兼非常接近原作嘅畫風,違和得黎好正!

 

 

《Palworld》由日本獨立團隊 Pocket Pair 開發,係一款多人連線動作角色扮演遊戲,採用第三身視點,開放世界。根據官方極其簡單嘅介紹,呢隻遊戲係與不可思議嘅生物「帕爾」(寶可夢)一齊過住悠遊自在嘅生活,並投身於與盜獵者們相互搏鬥之中……等等。不過有《Craftopia》做先例,就知道隻 Game 唔簡單。

 

 

帕爾有多種物種,各自有特殊能力,放電、放火、冷凍、飛行等能力大家都好熟悉架啦,分別係佢哋嘅「用途」,例如想釣魚只要將隻發電帕爾綁起再成隻掉落水就得。喺《Palworld》入面,帕爾除咗戰鬥之外仲要從事建築、農業、發電又或者喺工廠做苦工,因為只要提供飼料帕爾就會不斷工作,直到生命耗盡。

 

 

戰鬥方面,呢隻遊戲嘅訓練員係可以裝備槍械的(有突擊步槍、霰彈槍、狙擊槍、火箭炮等),所以自己有強大嘅戰鬥力。影片所見,帕爾有各種類型(造型極有《Pokémon》風格),有偏攻擊型亦有輔助型騎乘型等等,戰鬥中仲可以拎佢哋黎做盾牌擋子彈(真係物理上嘅盾牌)。玩家要面對嘅敵人係非法盜獵者,有趣嘅係自己都可以成為盜獵者,之後仲可以獵殺帕爾做食物,好鬼抵死。

 

 

遊戲採用開放世界,所以可供探索嘅元素都唔會少得去邊,基本上海陸空只要係見到嘅地方就可以探索,片中展示可作為坐騎嘅帕爾(有騎乘攻擊),亦有可飛行嘅類型。另外,遊戲將有繁殖及遺傳系統,帕爾喺繁殖時會繼承親代嘅特性,利用呢點將佢哋瘋狂交配就有機會創造出最強嘅帕爾。

 

 

《Palworld》預計於 2022 年上市,對應平台為 PC Steam,有興趣嘅朋友可以先將遊戲加入 Wishlist。

 

相關回帶文章:

【遊戲介紹】「抄」之極致 《Craftopia》將所有大作融合一身

五木

動漫電玩宅,極愛金田一系列,擅長動作及策略遊戲

追蹤

更多文章