【遊戲介紹】動作冒險解謎新作 《XEL》受薩爾達啟發全平台有得玩

《薩爾達傳說曠野之息》出現後啟發咗唔少遊戲製作人,今次介紹嘅新作《XEL》同樣受到佢嘅啟發,融合對動作冒險嘅熱愛以及講故事嘅熱情,並加入科幻元素,預計會喺下個月全平台推出,喜歡呢類遊戲嘅玩家留意啦。

 

 

《XEL》由只有十零人嘅德國工作室 Tiny Roar 製作,係一款動作冒險解謎遊戲,採用俯視視角。故事講述主角 Reid 遭遇船難,流落在陌生世界「XEL」並失去記憶。一次探索中偶然喺地下城發現奇怪裝置,並獲得穿越時空的能力。利用以外得到嘅能力,玩家得到喺呢個世界生存嘅力量,邊探索 XEL 邊努力恢復記憶。

 

 

戰鬥系統圍繞住攻擊、迴避、防禦、格擋幾個基本動作,亦有各種小道具幫助戰鬥及解謎,例如「抓鉤」就可令你飛去觸及不到嘅地方、移動大型物體甚至快速接近敵人。當然亦可升級武器、盾牌及裝置強化角色能力,甚至可收集素材製造藥水或其他工藝品。推進遊戲進度後,更可升及獨有能力解鎖時空能力,窺探不同時空中嘅幕後真相,感覺就好似「時之笛」咁。

 

 

《XEL》PC Steam & GOG 版本將於 7 月 12 日推出,Nintendo Switch 版本則於 7 月 14 日推出,另外仲會有 Xbox Series X|S、Xbox One、PS5、PS4 版本,預計於今年內推出,支援繁體中文。現時 Steam 有提供免費體驗版下載,有興趣嘅朋友可以試咗先。

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章