【試玩簡評】經典搞鬼作品重啟 《Saints Row》全新故事支援多人合作反轉城市

開放世界,黑幫,超級自由度,好多人都會聯想起《GTA》,但其實另一款有類似設定嘅遊戲系列《Saints Row》都有一大班 Fans,因為佢同前者唔同,走更瘋狂更搞鬼幽默嘅路線,成功贏得玩家支持。喺今年八月將會推出系列重啟作,以初代名字配上新故事、新設定、新玩法,早前我哋有幸參與優先試玩,下面為大家簡單講少少無劇透玩後感(無心機睇字嘅拉到落底睇片啦)。

 

 

《Saints Row》重啟版由 Deep Silver Volition 開發,係一款以黑幫為主題嘅動作冒險遊戲,採用第三身視點,開放世界,支援多人連線合作。故事設定於美國西南部中心地帶虛構城市 Santo Ileso,呢個城市基本上由三大幫派主宰,幾位年青人聯群結黨組成「聖徒」,建立犯罪帝國與其他三大幫派對抗,係一個年青人搞初創嘅勵志故事。

 

 

正路都係會講一講畫面,我只能夠講話「合格」,不過同其他新世代遊戲如《Elden Ring》、《Assassin’s Creed Valhalla》比較下就明顯遜色,特別係 In Game 人物模組情況更嚴重,希望正式版會有所改善。幸好,動作流暢度、駕駛速度感做得不俗,玩起黎都幾爽快。

 

 

故事劇情就唔講太多,主要係講系統體驗同遊玩感受。首先係最多人關心嘅一樣野:有繁體中文。然後係有極精細捏樣系統,幾乎可以改變角色任何地方,膚色身型當然不在話下,各種載具、武器、據點等等都係可以自訂,爽爆。

 

 

戰鬥部份有別於《GTA》,因為有得「碌」,節奏更爽快,加上有幾種新機制令戰鬥更好玩。「技能」升級後會習得各種戰鬥能力,例如「鳳梨快遞」就係捉住敵人塞手榴彈落佢條褲子,再掉佢出去炸晒成堆人;又有招「煙遁」:掉煙彈趁機走佬,技能過癮得黎又有真正作用,幾唔錯(未知會唔會有二代捉人做盾技)。「技能」之外仲有各種被動能力,例如蹲下行得更快、處決敵人回更多血等等,更有誇張嘅 Call 空襲技。

 

新動作爬上車頂幾正,可以喺駕駛中途爬上去,爬爬下覺得凍又可以縮返入去繼續揸,成個畫面好白痴

2022 年仲係無掩體射擊功能,係一大弊病

 

武器方面,暫時只係試到手槍、機關槍、霰彈槍、空手,同大家一貫認知差唔多,不敘。系列名物「The Penetrator」則未知會否登場,個人就非常期待用呢碌野一統天下(唔知係乜嘅自己 Google 啦……)。載具暫時試到除一般汽車外、貨車、救傷車、剷泥車等全部都有,速度同操控性有明顯分別,鍾意玩車呢部份朋友可以放心。

 

路上絕大多數物件都可以撞爛,高速飛馳確係無得頂

飛鼠裝突襲好爽下

 

當然,上面講果啲都係基本玩法,痴線嘅野依然會有,例如做「碰瓷黨」刻意比車撞呃保險任務,撞你架車爆炸的話就會好似「夜市人生」咁飛到勁高勁遠,玩家可於空中操作落點,如果落點有第二架車的話就會再炸起你,Keep 住不停炸起 > 落地連 Combo,好好玩。另外仲有運有毒廢料、偷車等任務,大量內容同朋友一齊玩就 Fit 晒!

 

 

總結:

《Saints Row》重啟版雖然畫面一般,但係遊戲性一流,可自由捏人又解除玩家「又逼我玩黑人」疑慮。痴線瘋狂元素依然有,戰鬥系統又唔錯,唯一擔心嘅係官方講就講係會帶來「全新體驗」,角色、幫派名都唔同,但係舊年八月製作團隊曾公開講過「遊戲中故事大綱與人物故事與初代將會維持不變,」到底骨幹係咪同原版一樣呢?個人希望係故事都係全新作品,話晒舊版故事係同續作有直接關連,如果骨幹無變咁我已經估到續集係點了……。

 

《Saints Row》將於 8 月 23 日推出,對應平台為 Xbox Series X|S、Xbox One、PS5、PS4 及 PC Epic Games Store,支援繁體中文。

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章