【遊戲新聞】萬眾期待手提機王 Steam Deck 香港區開放線上預訂

Valve 初公佈自家手提機 Steam Deck 時,有唔少本地自以為看透世事嘅媒體、KOL 批死「部野死硬」,點知部機一直都供不應求兼連續九個星期奪得 Steam 銷售排行榜冠軍。價格相宜、便攜、可順利運行絕大多數 Steam 遊戲令佢大受歡迎,不過早前只有歐美地區有得買,而家終於香港都可以訂啦!

 

 

包括香港在內,亞洲地區線上預訂由 Valve 與 Komodo 合作,除咗 Steam Deck 之外,Komodo 亦會為 Steam 開發及發行遊戲,首款遊戲會喺 9 月 TGS 中展出。今次開放亞洲地區分別有香港、台灣、日本、韓國等地區,預定年底陸續出貨,可到佢地網站進行預訂(//steamdeck.komodo.jp)。

 

 

Steam Deck 簡單講係一部針對 Steam 平台設計嘅便攜式小型 PC,除咗可運行 Steam 自家遊戲外,外國早就有玩家發現可進行破解,運行其他平台遊戲。根據 Valve 本身嘅計劃,將會推出可輸出影像、連接手掣嘅「Steam Deck Dock」,但早前就因為欠缺零件導致生產進度滯後,現時都未能推出市面。幸好機身本身有 USB-C 接口,可直接輸出影像至電視,亦有藍芽接駁無線手掣,坊間亦有第三方 Dock 可用,頂住先無問題。

 

 

Steam Deck 亞洲區產品出貨期預定為 2022 年底,售價為 HKD $3,288(64GB eMMC)、 HKD $4,388(256GB NVMe SSD)、 HKD $5,488(256GB NVMe SSD),即日起可到 Komodo 網站進行預訂(//steamdeck.komodo.jp)。

五木

動漫電玩宅,極愛金田一系列,擅長動作及策略遊戲

追蹤

更多文章