現時好多遊戲都採用免費遊玩制，但係 in game 就有五花八門嘅課金項目，真係完全免費嘅遊戲又會比人覺得係糞 Game。世事無絕對，日前就有一款完全免費嘅橫向射擊遊戲《Gun Devil》推出，動作流暢度極高，同時兼具難度，內容又搞笑幽默，短短幾日就得到「極度好評」評價，真係 DL 咗先講啦！

《Gun Devil》由獨立製作人 Agelvik 開發，係一款橫向射擊遊戲。故事講述撒旦之子「Dumbass」捉咗主角嘅老婆做佢嘅魔法老師，然後主角就化身為惡魔，一路上披荊斬棘排除萬難打爆「Dumbass」軍團救老婆，都係一貫大路野。

遊戲玩法主要係用槍射擊，配以「下墜」、「衝刺飛踢」、「騰空」等各種特殊移動手段擊殺敵人及避開陷阱。玩家將可解鎖四種武器，每種都有自己嘅用法，打出黎嘅節奏都有所不同。另外故事中出現嘅敵人攻擊方式都好過癮，例如狗狗 Boss 就有一招係「噴屎」，甚有《沙鍋曼蛇》（極上パロディウス）Feel。

《Gun Devil》已於 8 月 2 日推出，對應平台為 PC Steam，完全免費。