魂系遊戲不嬲備受機迷喜愛，啟發自魂系嘅「類魂」遊戲亦同樣得益，例如《記憶邊境》、《Lie of P》等遊戲由公佈初期已經備受注目。如果你同樣喜愛類魂遊戲的話，黎緊要追加埋今次介紹嘅《The Lords of the Fallen》，由前作《Lords of the Fallen》角色扮演遊戲變成類魂，加上奇幻風格背景吸引力十足。

《The Lords of the Fallen》由 Hexworks 使用 Unreal Engine 5 開發，係一款類魂角色扮演遊戲，採用第三身視點，支援二人線上合作。故事承接上集，雖然擊敗咗邪神阿迪爾，但係叫得做神又點可能真係被消滅。過咗唔知幾年之後，邪神阿迪爾再次復活，身為傳說中黑暗十字軍嘅一員，踏上穿越陰陽兩界嘅旅途，再次上演弒神之嘅故事。

玩家有九大職業選擇，有騎士有盜賊有魔法師等傳統職，武器就有成百種，有近戰有遠攻有法術，可升級自身數值、武器及防具，可自己捏人樣。遊戲中玩家會有一盞提燈，擁有穿越生死兩界嘅力量，喺影片中有展示使用提燈照出敵人靈魂再擊殺嘅力量。另外，除咗有二人線上合作之外，仲會有「魂系」入侵系統，可以去人哋度搞屎棍，正！

《The Lords of the Fallen》預計於 2023 年推出，對應平台為 Xbox Series X|S、PS5 及 PC Steam。