【遊戲評測】以隻狼系統做變化 《記憶邊境 Thymesia》突破原有框框以更緊湊方式戰鬥

以高難度見稱嘅魂系作品影響咗唔少人,同樣由宮崎英高製作嘅《隻狼》又帶大家見識到新世界。《隻狼》入面果種噹噹聲見招破招嘅格劍玩法令人著迷,可惜嘅係之後並未有 DLC 或續作嘅消息,市面上亦無類似嘅遊戲。肯好,台灣嘅極度邊緣工作室最近推出嘅作品《記憶邊境 Thymesia》就擁有接近《隻狼》嘅格劍系統,但佢地又並非搬字過紙,有加入新嘅變化,成為一隻別樹一格嘅優質作品!

 

 

《記憶邊境 Thymesia》有一般魂系都有嘅元素,例如係死亡掉落所有經驗、有限數量嘅補血瓶、坐火等,美術就比較有《Bloodborne》嘅味道,至於劇情反而係最弱嘅一環,敘事手法比較直線,雖然幾個結局有營造「黑暗」感覺,但內容都係比較單薄,幸好本作極為出色嘅戰鬥系統令人無視呢個弱點。

 

劇情敘事麻麻,但係運鏡幾講究,好多位都好型

補血瓶可加入唔同材料鍊成藥劑配方,會額外加 Buff,幾新鮮

 

戰鬥系統主要嘅玩法源自於《隻狼》嘅格劍系統,但係因為加入各種變化令對戰更緊湊,如果我話《隻狼》係偏向防守型「立回」,咁《記憶邊境 Thymesia》就更偏向攻擊型。打法都係睇準時間撳 Parry,部份不能 Parry 嘅強力招式可用閃避或用斷招,攻擊就主要係用軍刀普攻(R1 or RB)或者利爪(R2 or RT),但兩者又並非輕、重攻擊之分,要解釋就要講到本作獨創嘅核心「傷痕」系統。

 

 

喺《記憶邊境 Thymesia》入面,敵人係會有白色「實血」與綠色「虛血」兩種,要兩行血都扣到盡先可以處決敵人。當你對敵人造成傷害時,會扣減白血並露出底部嘅綠血,一般情況下綠血會維持約 4-5 秒時間,然後會慢慢癒合變返做白血。即係話,玩家不能打得太消極,因為只要你有一段時間無造成傷害,對方就會回血,逼你要積極採取攻勢。

 

 

戰鬥流程簡單講就係先用軍刀普攻或 Parry (招架)令綠血出現,再用利爪攻擊消減綠血。由於利爪攻擊並不能消白血,所以兩者要經常切換使用。當然,敵人亦並非弱智地亂攻任你魚肉,敵方攻擊有快慢之分,亦會使出有霸體嘅「強力攻擊」,喺使出前會出現一條明顯嘅綠色線,呢個時候睇準機會掉羽毛就可以 Cut 技並造成大硬值,可視之為《Bloodborne》槍反或《Dark Souls》盾反。另外,Boss 喺「強力攻擊」以外仲會有一招不能擋格不能斷招嘅大技,使出前會出現紅色線,要第一時間遠離。

 

呢個時候睇準機會掉羽毛就可以 Cut 技並造成大硬值

掉羽毛 Cut 技之外仲可以喺敵人攻擊臨擊中前向敵人方向閃避,成功的話就會踩頭跳上空中發動攻擊(類似《隻狼》看破)

 

雖然戰鬥系統同《隻狼》有唔少相似元素,但係本作嘅天賦技能樹又令玩法有唔少改變。以一般 Parry 為例,透過「偏斜招架」可大幅增加有效時間,但如果你自問對 Parry 無信心的話,亦可揀另一條天賦「防禦」,將 Parry 變為純粹嘅擋格,雖然只有 75% 減傷,但可耐心等到敵人露出破綻先反擊,配合「連擊爪 Lv2」 以利爪攻擊五次後,每次攻擊都會固定回一定血量。由本身高風險高回報嘅 Parry 流變成穩打穩紮嘅擋格流,靠嘅就天賦系統。除咗上述玩法,仲有其他配搭方法,有猛攻十字斬、羽毛派身飛身斬等等,差唔多每個天賦都有分支,而且可隨意重點,可塑性極高。

 

大多數天賦都只能二揀一,不同天賦對戰鬥有極大影響

其他好用嘅天賦有快速接近敵人「突刺」,可有效地黏住對手攻擊

或揀選另一天賦分支,有大硬值時打一套大傷害必殺技

 

瘟疫武器係本作另一主要系統,分為暫時性及永久擁有兩種。暫時性可以用儲力利爪攻擊喺敵人身上奪取,可無消耗使用一次;永久性就係透過擊倒相關敵人收集武器碎片解鎖、升級,裝備後消耗能量使出。當中包括短刀、長槍、短弓、鐮刀、大劍等多達廿十一種武器,每款都有不同玩法,例如短劍發動快兼且係少數可消綠血嘅武器、弓箭可遠距離發動攻擊、盾牌可不受傷害反擊、大劍可擊倒敵人等等。

 

瘟疫武器非常好玩

 

更正嘅係透過升級瘟疫武器可解鎖派生動作,例如短弓變成二連射、長槍由三連刺變迴旋揮舞再追加擊倒屬性、大劍由慢速高攻揮砍變成高速橫劈等等,不但有更多用途,打王時加入瘟疫武器收尾往往會增加更多輸出機會,喺一眾瘟疫武器入面搵出適合自己用嘅,再因應情況使用玩出自己嘅打法。

 

 

講咗咁多好玩嘅地方,最後都要講返少少可進步嘅地方。首先係新手教學做得非常一般,特別係雙血傷痕系統並無詳細解說,唔少人都喺不明不白情況下上路。再者係難度曲線非常奇怪,第一隻出現嘅 Boss「馬戲團團長奧德」已經有快慢攻擊、變節奏攻擊,仲要有兩行血兩個型態,對於仲未了解雙血系統嘅玩家簡直係惡夢,作為首隻 Boss 係非常之勸退,希望下一款作品會加強解說部份。(利申:《隻狼》敲鐘苦難不升攻擊力全破,但喺未了解雙血系統下都要死十幾次先過到)

 

第一隻 Boss 已經好難打

 

總結:

近年台灣製遊戲水平越黎越高,《記憶邊境 Thymesia》就絕對係屬於高水平類別,雖然劇情、教學、難度曲線、地圖探索等缺點不少,但瑕不掩瑜,不論美術、UI、音樂、耍帥場景等等都係非常上乘,特別係戰鬥系統更加係精彩,出色程度即使與 3A 大作比較亦毫不輸蝕。

 

呢個水平嘅美術,比起 3A 大作絕不遜色,仲要係遊戲截圖黎咋!

 

考慮到只係由唔夠十人嘅團隊製作,做到咁出色嘅戰鬥系統已令人眼前一亮,可惜受限於獨立製作,缺乏資源情況下整體遊玩時數並不多,正常情況下 12 小時內已可全清。身為魂系資深玩家,用唔夠十小時就全破,但係呢十小時令我玩得非常愉快,同時期待佢哋嘅下一款作品!

《記憶邊境 Thymesia》已經推出,對應平台為 Xbox Sereis X|S、PS5、Nintendo Switch 及 PC Steam,支援繁體中文。

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章