【遊戲新聞】台灣製作中式恐怖 《女鬼橋:開魂路》開賣後極暢銷兼奪得極好評

恐怖遊戲不嬲都極受玩家喜愛,但因為多數都係外國廠商開發,用嘅自然係外國社區、人物,投入感自然爭少少,想玩中式恐怖 Game 仲要有質素嘅就更少。之前為大家介紹過嘅台灣製作中式恐怖遊戲《女鬼橋:開魂路》日前正式推出,以現代台灣真實校園靈異故事為背景,改編自 Netflix 台灣恐怖驚悚電影《女鬼橋》,推出幾日已經大賣兼掃埋「極度好評」評價,勁!

 

 

《女鬼橋:開魂路》由大宇資訊製作,係一款隱蔽類恐怖冒險遊戲,採用第一身視點。遊戲改編自台灣真實校園靈異故事,以十大校園恐怖傳說聞名嘅東湖大學流傳住一則傳說,學校內嘅一座橋上有位陰魂不散嘅女學生鬼魂。相隔多年,玩家將扮演六位大學生們並喺呢度舉行試膽大會,挑戰呢個校園傳說,然後身邊開始發生各種奇怪事件,到底呢班學生要點樣先可以逃過一劫?

 

 

玩家喺整個探索過程中隨時都要準備逃跑,因為女鬼會突然現身獵殺你,手無寸鐵嘅你,唯一可做嘅就係觀察四周,利用隱蔽空間躲避女鬼。喺學校入面除咗逃命,仲要探索四周尋找線索,蒐集關鍵物品破解機關謎題,順便探查校園內隱藏嘅謎團,拼湊出女鬼背後嘅真相。

 

 

由於係以現實傳說做藍本,所以各場景都盡量真實地還原,加入現實生活細節,例如黑板邊畫公仔、學校留言板等等,希望令玩家玩得更投入。遊戲喺 8 月 25 日推出,喺短短 12 小時內已經衝上 Steam 暢銷榜三甲,最高峰去到第二位,就連同期嘅《 SD GUNDAM 激鬥同盟》排喺佢之下。銷售量高,同時評價亦都非常不俗,不但得到「極度好評」評價,喺台灣各論壇都有非常多討論,真正叫好叫座。

 

 

《女鬼橋 開魂路》已經推出,對應平台為 PC Steam,支援繁體中文。

五木

動漫電玩宅,極愛金田一系列,擅長動作及策略遊戲

追蹤

更多文章