類惡魔城遊戲可以話係獨立製作人最喜歡嘅類型，每年都有海量呢類作品推出，今次介紹嘅作品《9 Years of Shadows》亦係屬於呢類型，但係就加入各種元素令作品更為獨特。眾多元素入面，最吸引嘅一定係角色設計，身上穿著嘅「聖衣」極有《聖鬥士星矢》嘅味道，加上獨特嘅系統，自然令人期待。

《9 Years of Shadows》由獨立工作室 Halberd Studios 開發，係一款類銀河惡魔城橫向動作遊戲，但係人設同護甲就極有《聖鬥士星矢》嘅味道。故事講述世界經歷九年巨變後失去所有色彩，人間只剩下黑暗，失去並不只有顏色，仲有歡樂以及希望。玩家將扮演年輕戰士 Europa，與顆伴熊仔 Apino，前往黑暗起源之地，尋找為大地恢復色彩嘅方法。

Europa 使用長戟作主要武器，使用連擊及衝鋒攻擊殺敵，當你喺適當時機進行衝鋒更可擊退敵人遠程攻擊，高階技巧。本作最大賣點係元素護甲系統（即係聖衣），除咗附加電、水、土、火屬性之外，更可透過切換護甲獲得於瀑布中活動、穿越地下隧道等能力，用於打 Boss 或尋找隱藏物品。

護甲設計一睇就知參考自邊件聖衣

遊戲中加插動畫，變身著甲果下根本就係《美少女戰士》……

場景就係一座巨大嘅城堡，有各中機關，探索玩法就同《惡魔城》系列差唔多，輔助小熊則有遠程攻擊魔法、補血、消子彈等能力，同《惡魔城》入面嘅使魔差唔多。部份 Boss 戰就有濃厚《洛克人》影子，都係困於一個小房間，與 Boss 進行一對一戰鬥，睇準時機避開攻擊反擊。

《9 Years of Shadows》預計於 10 月 10 日推出，對應平台為 PC Steam，Nintendo Switch 版本預計於 2023 年第一季推出。