近年加密貨幣同 NFT 嘅興起，令不少人向遊戲發展，希望將區塊鏈放入遊戲，以「玩住賺」做綽頭，但不論係遊戲定 Youtuber，玩親呢樣野絕大多數都係失敗收場。最近，根據外媒 PC Gamer 嘅報導，NFT 支持者不但未因種種挫折氣餒，反而諗出更為地獄嘅想法。
報導內容以一款仿《Minecraft》嘅NFT 遊戲《Critterz》為引子，喺遊戲初期以「玩住賺」（Play to Earn）做賣點成功吸引大量玩家，有部份人更開始請人打機。喺呢班人入面，有一位玩家 Big Chief 就投入大量資金，用賤價組建一隊由菲律賓兒童組成嘅「團隊」，工作係幫佢收集建築用嘅大量素材，另外再用 USD $10,000 請一班「專業《Minecraft》建築師」負責興建。
根據 Big Chief 本人嘅講法，因為呢班兒童喺佢地本國賺錢並唔容易，所以提供呢個方式去幫助佢地。至於呢班兒童嘅薪酬有幾多，佢就話無法透露，只係話菲律賓人賺得好少錢，生活成本亦都好低就算，其實已經暗示咗係廉價勞工。
本來只係一份生意，各取所需外界都無乜野好講，但隨住《Critterz》玩家人數上升，遊戲入面嘅貨幣 $BLOCK 價值開始下降，因為人們要用遊戲錢換返現實嘅金錢生活。呢個現象導致遊戲中嘅 $BLOCK 數量過剩，從而壓低了價格。與其他加密貨幣一樣，$BLOCK 市價喺今年 1 月到 5 月由高位 85 美分跌到 3 美分。去到七月時，開發商 Mojang 宣布全面禁止任何以《Minecraft》為 Base 嘅遊戲加入 NFT 元素後，$BLOCK 市價大幅貶值至原來一半。
收入下降自然令玩家流失，此時《Critterz》已經無乜未來可言，Big Chief 當然亦都有損失，同時無辦法再「幫人」。當你以為呢類區塊鏈遊戲正式玩完，你真係太低估人類嘅惡意，因為區塊鏈遊戲顧問公司 Wolves DAO 嘅 Mikhai Kossar 就諗出一個更為地獄嘅方法。
呢位人兄諗出嘅方法係考慮到發展中國家可提供廉價勞動力，例如用菲律賓人「變」做 NPC。簡單講就係叫人喺區塊鏈遊戲入面扮演隨機嘅工作，有可能係釣魚、做店主甚至係無聊地來回行路，用意係比其他富有嘅玩家娛樂。
成件事睇落去係好地獄，但係絕非不可能，特別係只要牽涉到金錢，就一定會有人願意配合，即使叫你做果樣野係等同於「剝削」。喺不久嘅將來，現實可能好似電視劇咁，出現由真人扮演 NPC g嘅血汗工廠。
不撤不退，我愛香港。