超級長壽兼擁有無數 Fans 嘅生活模擬遊戲《模擬市民 4》（The Sims 4）主遊戲將會喺十月迎來大改變，因為即將變成免費遊戲，所有玩家都可以喺任何平台免費玩到呢隻超經典作品，而且舊有玩家只要喺特定時間登入就會得到 DLC 套件包，真正喜訊！
根據官方新聞稿表示，《The Sims 4》將於 10 月 19 日變成免費遊玩， PC 玩家都可以透過 EA App 或者 Origin 下載，Mac 則可以使用 Origin， 抑或用 Steam、PS5、PS4、Xbox Series X/S 與 Xbox One 等系統免費下載。
當然，《The Sims 4》嘅海量收費 DLC 亦都係非常出名的，如果你係 EA Play 或 EA Play Pro 會員，10 月 19 日可隨僅限會員嘅《The Sims 4》同捆包加入 The Play List 而獲得升級版體驗。《The Sims 4》 EA Play 版包含 《The Sims 4 來去上班》資料片，而 EA Play Pro 版則包含 《The Sims 4 來去上班》資料片及 《The Sims 4 幼兒組合》。
至於本身已經擁有《The Sims 4》嘅舊有玩家，由 9 月 15 日至 10 月 19 日其間，所有已購買《The Sims 4 》主遊戲嘅玩家只要登入遊戲即可領取《沙漠奢華套件包》，可使用以西南部沙漠自然景觀為靈感嘅石頭及木材等材料，製作自家現代綠洲。
另外，隨遊戲免費化，製作團隊亦會繼續做新嘅內容包、套件包和模擬市民快遞，努力吸引大家課金。有興趣了解之後開發嘅內容，可留意 10 月 19 日凌晨 1 點，喺 The Sims YouTube 及 Twitch 頻道將進行特別實況轉播活動「Behind The Sims Summit 」，會有相關開發資訊發表。
動漫電玩宅，極愛金田一系列，擅長動作及策略遊戲