【遊戲新聞】EA 正申請全新專利「自動教練」 用 AI 分析玩家行為提升實力水平

熱愛玩對戰競技類遊戲嘅玩家好多時都會面臨「樽頸」嘅問題,即係打到去某個排位就升唔到上去,呢個時候通常會有兩個做法,最主流嘅就係賴隊友垃圾,較少選擇嘅就係檢視自己不足再去作出改變。要真正改進自己技術當然應該選擇後者,但即使你想檢討亦未必知道如何入手,幸好未來科技將會幫到大家,因為 EA 就正申請一項專利,功能就係幫大家「執」錯處。

 

 

根據多個外媒報導,EA 最近申請緊一個遊戲專利「自動教練系統」(Automated Coaching System),功能係透過紀錄、識別玩家係對戰中出現嘅錯誤,再分析因為咩原因導致呢啲錯誤出現,最後通過複雜嘅半隨機計算,給予玩家改進嘅建議,同時亦會依據 ADS(瞄準射擊時間)、步行時間及傷害量等數據,制定出適合該玩家嘅調整方向。相信此系統正式實行後,將有效提升玩家對戰嘅水平。

 

 

雖然今次嘅專利申請並無講明針對咩遊戲開發,但係內容有提及槍械、準繩度、手榴彈等字眼,肯定唔會係《模擬市民》先,暫時最有可能會應用呢套嘅嘅遊戲應該會係《戰地風雲》(Battlefield)系列又或者係《Apex Legends》等遊戲。

 

 

喺競技類型遊戲加入呢套新系統,長遠對玩家黎講就一定係正面,特別係有改進系統的話會令遊戲吸引力增加。雖然暫時未有更具體內容,但睇描述主要都係圍繞個人技術提升,團隊合作觀念等就唔多覺眼有提及,估相信即使呢套 AI 系統推出後仍會有大量可改進嘅空間,但幫助玩家技術提升就肯定有幫助。

 

滅盡殺手

重度魔物獵人中毒者,歷代遊玩時間破億分鐘!

追蹤

更多文章