【遊戲介紹】獲獎優質橫向動作 《神之天平》戰鬥系統極豐富創意合成系統

熱愛玩橫向動作角色扮演遊戲嘅玩家,每個人都有自己嘅心水作品,當中《惡魔城 月下幻想曲》相信喺唔少人心目中都係榜上有名嘅作品,精緻嘅美術、角色間嘅故事、配裝、刷裝備、Chok 招等等喺今時今日仍然係同類作品常見元素。今次為大家介紹嘅作品《神之天平》就有晒上述咁多種元素,仲要曾奪得「フリーゲーム大賞」,擊敗六百多款遊戲,分數拋離第二位成績嘅情況下奪得冠軍,實力備受肯定。

 

 

《神之天平》(ASTLIBRA Revision)由日本獨立製作人 KEIZO 花費十四年時間開發,係一款橫向動作角色扮演遊戲。故事講述主角與青梅竹馬少女雁影原本喺村中平靜生活,但因為龍嘅來襲而意外地去到一個見唔到其他人類嘅世界,為咗尋找回家嘅道路只好踏上旅途展開冒險。(劇情真心唔錯,真係有去用心描寫的)

 

 

遊戲開始時主角只有使用基本武器攻擊、盾牌擋格、跳躍等等作,但之後會陸續學到二段跳等各種技能及魔法,當中技能配搭極豐富,例如將攻擊力谷到三倍,但係會變得不堪一擊。遊戲中可供學習技能多達九十多種,只要你有點數就可以學兼自由組合,加上本作有「刷裝」系統,你想玩一隻專精飛刀、弓箭嘅戰士又得,想玩可近戰可魔法嘅法師型又得,超過 230 種裝備、300 種物品任你玩,完全係俾玩家自由發揮。

 

 

除咗配裝配技,本作仲有樣野叫「憑依技」,可視之為具屬性嘅戰技。喺舊版本時要「Chok」招,不過去到新版已改為組合按鍵嘅方式,更易使用。戰鬥系統以外,本作仲有個核心系統「天平」,遊戲中所有道具都有設定重量及附加效果,只要使用「天平」就可將道具強化。方法係將要強化嘅道具放喺天平嘅兩端,系統會根據兩邊嘅平衡度去決定效果上升嘅比率,即係可以透過此系統去「刷」神裝出黎。

 

 

有裝備之後梗係要搵人黎試刀,遊戲中有多款 Boss 供玩家挑戰,當中包括有半個畫面咁大嘅巨型 Boss,玩家要睇清楚對方攻擊模式反擊。會有六個難度選擇,玩家可按自己能力揀選,一週目大約要用 30 小時爆機。

 

 

《神之天平》(ASTLIBRA Revision)將於 10 月 13 日推出,對應平台為 PC Steam,現時商店頁面有提供試玩版下載。

五木

動漫電玩宅,極愛金田一系列,擅長動作及策略遊戲

追蹤

更多文章