仲記唔記得上年年尾同大家介紹過隻近半米高、可以合體嘅 LEGO 宇宙大帝先？製作者 Anthony 半年後又有新作，今次唔玩合體玩變型！挑戰經典特撮機械人 – 大鐵人 17

大鉄人17 Daitetsujin 17 By Anthony Lee

關節效果做得非常唔錯，同合金比都唔輸蝕架

飛行 One-Seven (飛行ワンセブン) 形態

仲特登砌埋 無人偵察機 (シグコンジェット) 同埋 萬能戰車坦克 (シグコンタンク)

無人偵察機、萬能戰車坦克出動！

如果熟識經典特撮嘅朋友就一定認識大鐵人 17 ，話晒佢都係首批變形嘅特撮機械人。雖然喺劇中或者玩具產品，大家都知道大鐵人 17嘅變型狀態都係摺埋/打開咁間單，就算製作者 Anthony 開初都同樣認為。但佢做做下先發現自己低估左個難度，原來腳部關嘅摺合係比預期中難做。

淨係要解決呢個變形結構嘅問題都搞左足足一個月，差啲搞到 Anthony 想放棄

再加上 Anthony 細個係睇特撮版長大，但特撮版始終係人扮嘅，睇落大鐵人 17 就會變得頭大身細。後來佢轉以近年所出嘅玩具產品比例去製作， Anthony 覺得睇落係型好多，不過成個作品嘅負重就成為左佢另一個要解決嘅問題。

睇落簡單好多嘅大鐵人 17 ，結果仲高難度過佢前作嘅宇宙大帝 

而啱啱過去嘅 JBF 2019，大鐵人 17 同 宇宙大帝  亦有喺現場展出

問到 Anthony 會唔會做埋細佬大鐵人 18出嚟做返個兄弟重聚，但佢話應該就唔會製作 大鐵人 18 啦。雖然佢細個第一次睇電視睇到喊就係 大鐵人 18 之死，但始終想做返變形、合體嘅角色。心目中已經有選擇，不過短期內唔會咁快動工。

大鐵人 17 已經擺左上 LEGO Ideas 投稿，如果你都想支持佢一票，就快啲去下面嘅傳送門登記同投票啦！

Anthony 大鐵人 17 LEGO Ideas 傳送門