呢套《今個聖誕無銀用》(Office Christmas Party)係《醉爆伴郎團》幕後班底新作，而且《今》片卡士更加超越前作，本身已經令人非常期待，睇完之後更加想講句：入場包你唔會後悔！
好似每年聖誕都會有套咁上下既搞笑電影上映，未入場已經知道係純粹想哈哈哈返個零鐘開心下，睇得呢類戲都唔會期望劇本會有幾完美。出奇地，《今》片整體劇情都頗為順暢 (雖則個尾收得有啲奇怪)。 故事主要講公司生意唔好，大老闆話如果再無生意接到返黎就要摺，身位分行 CEO Clay就決定為尚未決定合作與否既 Walter 搞返場 Party 盡地一舖，希望贏得合約歸，人人有工開咁。
成套戲由頭到尾都充滿住大量gag位，如果有睇開西片既話相信會笑得更開心 (玩咗好多唔同電影橋段)，個人非常欣賞 Jillian Bell 演繹媽媽生既情節。另一樣抵讚既係《今》片無一貫呢類聖誕既堆砌感，亂黎之中見到條理，唯獨電影到中段時間有少少「立」，而且呢類聖誕片就唔洗講都知會係大團員結局架啦，之但係尾段都係有少少趕收工既感覺，此為美中不足之處。
整體黎講，成套戲無硬 Sale 愛情友情親親 bla bla bla，反而令我睇得幾舒服，亦都有感人生有班真正咁既同事的確好極。聖誕檔期，想開開心心笑返餐，《今個聖誕無銀用》絕對可以滿足到你，電影會於 2016年12月8月上映。