今次成單花生其實係源於 Capcom 官方宣布，正式廢除由街霸5 助理製作人綾野智章負責既「綾野最強 BLOG」，改為開一個新既網站「格斗家研究所」取代，而呢個新網站並唔係繼續由綾野主持，改為由之前隸屬人事部，而家轉為助理製作人既松本脩平主持！
先講日本方面，街霸5製作人杉山晃一自從係 6月果陣講過 8F Delay 係佢地刻意做出黎之後 (Capcom USA 發言人Combofiend其後公開表示杉山既解釋係錯的)，就再無係任何日本以外既賽事上面出現過。而小野義德因為上咗神枱既關係，街霸5佢又無乜實權，皇天擊殺佢唔係咁易，所以矛頭直指公然同 Capcom USA 作出相反言論既杉山同力撐亞洲玩家既綾野。
小野綾野
而傳聞屬於 Capcom USA 既呢位新製作人都幾謎下，一直都唔係好知佢乜水黎，佢第一次公開露面係公布新角 Urien 果陣 COS 過，出場果陣仲話呢個造型會取代綾野 COS 既春麗成為招牌咁話啵。咁講到 Capcom USA 就不得不提因為街霸4既成功比咗佢地好大既信心，所以街霸5就係由 Capcom USA 主導製作，日本團隊就負責執行，當然啱啱打完既 Capcom Cup 由美國人拎冠軍對 Capcom USA 亦都係打咗支強心針。
初次公開露面既松本脩平
雖然係咁，但係咁大間公司都係需要交數既，街霸5推出到而家一直問題多多，最為人詬病既就係 Network 同平衡度。雖然話而家有極大既改善，但係 The Damage is Done (講英文幾型！)，係銷量以及比賽觀看人數都同街霸4有咁大距離下要搵個人出黎孭鑊都預咗，咁街霸vs鐵拳已經衰過一次既綾野好明顯就係首選啦 (當然都有可能係綾野做得太好而比 Capcom USA 提子啦)！
2016 Capcom Cup 官軍NuckleDu
如果以上情報同猜測屬實，到底正式踏入第二季既街霸5 淨係得 Combofiend同杉山會搞成點呢？定係直接用新既 Marvel vs Capcom黎打 CPT？都係果句啦……大敵在前 (KOF) 就唔好掛住搞政治啦……
(以上分析全屬現有情報下的猜測)
VJGamer總編，細細個已經蒲機舖，機齡甚深，熱愛電玩文化。