最新一集《變形金剛》電影 – 《變形金剛：終極戰士》(Transformers: The Last Knight)將會係今年6月22日上映，導演依然係 Michael Bay， 今年亦都係《變形金剛》真人版電影誕生10周年，雖然每集電影都好壞參半，但電影玩具依然備受追捧，前幾日孩之寶係香港舉行發佈會，率先披露兩款新電影玩具!

係先前嘅《變形金剛：終極戰士》trailer 都見到今次柯柏文係太空飄浮，最尾仲好似入咗魔雙眼發紫追殺大黃蜂，究竟發生咩事真係上映先知，睇番隻玩具，今次呢隻領袖級柯柏文全身以黑色舊化顏色為主，隱約見到火焰拉花，眼睛部份呈紫色，配件有盾同大劍。


縱使今次包裝以揭頁式設計及亞洲限定，眼利嘅玩家應該會發現其實係將 2014年推出嘅領袖級柯柏文重新上色，變形設計同外型完全冇變，雖然今次柯柏文係新一集可能冇新造型，但係電影玩具係咪應該有改進呢? 對於呢隻所謂亞洲限定真係完全失望。

2014 年 《Transformers: Age Of Extinction 》ver.         2017 年 《Transformers: The Last Knight》ver.

今次發佈會另隻電影玩具就係MP(Master Piece)大黃蜂，MP(Master Piece)係最忠於原著同還完度極高嘅系列，呢隻MP大黃蜂係《變形金剛》真人版電影第三隻MP系列，以第一集嘅造型為設計藍本。

變形步驟高達 33 個，車型及機械人型態還完度極高，戰鬥面罩配件可拉下，手部同電影一樣可變形而唔係換配件成為手炮形態，而且成隻玩具仲有合金成份，夠份量以及玩味度大增!

今集大黃蜂造型

總括黎講，MP(Master Piece)大黃蜂值得期待，而亞洲限定版柯柏文睇黎等跌價或甚至變死貨以及贈品再考慮都未遲~