腐女子大愛手機Game 《被囚禁的掌心》今日繁體中文版上架!附上遊戲流程介紹

CAPCOM 在 2016 年 8 月份推出《被囚禁的掌心》(囚われのパルマ)之後大受歡迎,不過本類型文字遊戲對於日文苦手嘅玩家黎講,始終好難完全投入故事;好消息係:官方中文版今日會於 iOS 及 Andorid 雙平台同時上架!

 

日文版目前推出左兩個角色路線可以攻略:HARUTO(CV. 梅原裕一郎)以及 AOI(CV. 內田雄馬)。玩家飾演嘅女主角喺一場誤會之下被人帶到荒島上面,而荒島上面嘅監守所就囚禁住失去記憶嘅男主角;玩家想離開荒島的話,就要幫助監守所嘅人搵返男主角嘅記憶……表面上大家就話男主角係因為犯罪所以被囚禁,但係隨住故事嘅推進,你會慢慢發現背後其實係一層一層嘅陰謀同埋秘密;而喺同男主角相處嘅過程入面,你同男主角亦會慢慢建立出感情……

 

遊戲總共有 6 個故事章節,序章同第一章故事係免費試玩,想完成全個故事、或者想獲得同主角額外嘅相處時間,例如延長對話時間、對方模擬打電話比妳嘅場景等等,就請各位課金了(我係全課的orz)

 

 

遊戲流程分三部份:日間有兩次在大地圖上探索嘅機會,夜間可以選擇送 Key Item 或者禮物比男主角;而隨住劇情發展以及每日探索會觸發唔同嘅「話題」,玩家可以用呢啲「話題」同男主角 send sms 傾計。

 

 

至於遊戲最重要嘅部份之一就係:同男主角喺囚室對話!呢個對話過程係推進主劇情嘅方法,亦係傳說中嘅 Mon 咚 LOL!隨住男主角對你好感度越高,佢嘅語氣同埋用字都會越黎越溫柔,仲會越控越近,加上全語音嘅關係,我玩 HARUTO 路線時玩到欲罷不能,好想一個反手撲倒佢呀~~(喂)

 

雖然對話有選項,但係玩家唔需要擔心揀錯會扣好感度等等;因為遊戲個重點係比玩家「感受」同「經歷」而唔係「攻略」,所以就算個 game 係 auto save 都可以放膽隨便玩,唔駛驚有 Bad End。

 


 

遊戲另一個有病…唔係,我意思係有愛嘅趣味點就係:玩家可以 24 小時監視住男角色嘅一舉一動(意識上係變態,但係呢啲先係萌點)你可以睇住佢用你送比佢嘅牙刷同底褲、可以睇住佢除衫入廁所沖涼、可以見到佢對住盆花思春咁話掛住你……痴線,唔係唔萌呀?我簡直玩到個心完全融化!作為市面上第一隻女性向「體感手機戀愛遊戲」,我覺得呢隻 Game 做得超好!遊戲入面解鎖嘅 CG 同 Event 都可以喺 Menu 度隨時睇返架!

 

 

遊戲仲有一個「夢」部份就係幻想同唔同形像嘅男主角滾床單!呀,唔好諗歪,好純潔架,淨係負責叫佢起身架咋!透過幫男主角換上唔同嘅道具,佢喺「夢」入面嘅反應同對話都會有所改變;對於有置裝控或者聲優控嘅玩家黎講呢一部份應該都幾吸引,好彩我本命聲優唔係梅原,如果唔係課金課到2046都未儲齊啲道具呀!

 

 

P.S.《囚》喺日本嘅人氣相當高架!我 2016 年 12 月仲去左池袋間 animate 參加左期間限定 Event,可以感受比聲優玻璃壁咚你!如果呢個遊戲遲啲出落 PS4 加埋 VR 黎玩,我就真係明點解日本啲女仔而家話唔駛喺三次元搵男朋友都可以好幸福 ❤

 

 

《被囚禁的掌心》中文版下載傳送門

iOS Android

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章