鍾意玩傳統日系 RPG 嘅朋友一定有聽過 Falcom 公司嘅大名，著名嘅《伊蘇》同埋《軌跡》系列咁多年黎絕對係陪住大家成長啊！不過 Falcom 大社可能了解到「要進步就唔可以淨係靠食老本」嘅道理（我真係無特別針對闇榮●雙系列嘅意思，我真係無），所以，除咗以上兩個背景都發生喺架空世界觀嘅遊戲系列之外，Falcom 於 2015 年推出咗《東京幻都》（東京ザナドゥ）；而今次包膠寫嘅《東京幻都 eX＋》，就係遊戲嘅加強版，仲要有中文化添！

【故事大綱】

劇本發生喺現代嘅東京都杜宮市，劇本圍繞住以男主角「時坂洸」為主嘅一群高中生進行。表面上繁榮嘅都市出現咗異變，主角為咗保護幼馴染「栞」而意外進入異空間，勇者之路正式開始！但係 Falcom 出嘅劇本又點會咁簡單？隨住劇本推進，男主角開始懷疑自己嘅記憶，到底十年前東京發生嘅災難性地震、以及男主角腦入面偶爾閃過嘅記憶斷片有咩關係呢？真相係點我當然唔劇透啦 (〃∀〃)

話哂係加強版，首先比大家睇吓 2015 ver. 同 2017 ver. 畫質方面嘅進步。

2015 版：畫面明顯起格；店舖內展示同社作品《閃之軌跡 2》

2017 版：線條明顯俐落得多；店舖展示更新為今秋發售的《閃之軌跡 3》

加強版亦提供咗更高難度比玩家選擇。

2015 版

2017 版：加強難度後，一周目玩 Calamity 係頂級自虐 Play

基本上開 Game 無耐就會開始戰鬥，所以先由戰鬥系統講起！進入迷宮之後，首先會出現整備畫面比玩家替換角色裝備。不過，影響戰況嘅唔單止係裝備，仲有角色嘅屬性！圖入面顯示嘅「有效屬性」焰、靈、鋼，意思係呢三個屬性最能夠剋制迷宮入面嘅魔物；所以出戰整備嘅時候，就建議玩家選擇代表相當屬性嘅角色出戰。

五種主要屬性「焰・靈・風・鋼・影」；《eX＋》新增幾乎剋盡萬物嘅「聖」屬性

迷宮同基本戰鬥方面無咩難度，不外乎一些跑跑跳跳，以及部份需要特定角色能力開啟嘅隱藏門或機關。攻擊係正方，跳係 X，按住 R1 可以唔扣氣快跑，跳起再按正方形就可以進行「飛躍」以通過迷宮入面一啲斷層或者高低差大嘅階段。喺戰鬥入面可以隨時按三角形切換操控角色，如果轉角色後出招夠快，連擊數係唔會斷的。

比較特別嘅係必殺技以及儲氣系統 X-Drive。傷害敵人嘅同時 X-Drive 會不斷累積，滿 100％ 時可以撳↓制出特殊技或者角色間的連攜技；至於閃電標誌嘅六角圖示，儲滿一格就可以出超必，但如果兩格滿哂先出就會對敵人造成更大傷害值！

至於一開始提到嘅屬性有咩咁重要呢？以相剋屬性擊破敵人除咗提高傷害值之外，仲可以增加 Critical 攻擊機率、以及提昇你嘅戰後評價。戰後評價主要由三方面影響：戰鬥中受到嘅傷害值、迷宮內魔物擊破數量、以及寶箱及素材獲取量。如果在戰鬥中（1）無損傷通關（2）通關時間夠快（3）以相剋屬性擊破敵人及（4）連擊率夠高，則會得到加乘的評價分數。

全迷宮可以事後再挑戰；全部 Rank S 的話會有金獎杯喔！

每次戰鬥後亦會獲取「Soul Point」以及「勇 Point」。Soul Point 等於角色之間嘅牽絆值，隨住點數增加，每個角色自己獨有嘅 Soul Ability（特殊戰技）亦會隨之升級；同時，角色之間好惑度……我意思係牽絆值去到 Max 級嘅話，於遊戲最終章可以見到特別劇情喔！唔單止女角架，就算你同個男角色好惑度滿都一樣會發生架！（Falcom 出品嘅男主角果然繼續很吃得開～）

至於 勇 Point 就關乎男主角三項能力值「智・仁・勇」；「智」透過遊戲中閱讀提升、「仁」就靠做支線任務、戰鬥就可以加「勇」。另外喺遊戲中收集道具、積極同他交流等等都可以分別為各能力值加點數。各項能力值每升一級，可以到「九重神社」搵爺爺換取珍貴嘅裝備道具，不過，最重要嘅係：男主角能力嘅高低係會嚴重影響遊戲結局發展的！所以玩家一定要勤於育成洸君啊～

《eX＋》仲有一個新增要素：喺每一章故事完咗之後會多一個 Sub Story，比你操控神秘角色以另一個角度雙重推進劇本。有玩過舊作嘅玩家應該覺得好欣慰呀……因為第一代入面對呢個角色嘅描寫係雷聲大雨點小，暗示佢係關鍵人物，但限於遊戲篇幅，結果一個精心設計出黎嘅人物變成大茄！今集可以玩佢條路線，仲可以補完咗劇本部份薄弱位，最重要嘅係：呢位人兄玩純白制服 Play 呀！（誤）

佢個聖屬性開頭真係屈哂機

作為 Falcom 第一個現代劇作品，遊戲系統方面都好細緻地將現代要素滲透喺故事入面，最明顯嘅代表當然係智能電話！電話喺遊戲裡除咗用作同朋友通訊，同時擔當咗 Menu 嘅功能，遊戲入面所有資訊，例如任務提示及進展度；角色裝備、等級及成長；魔物圖鑑等等都一覽無遺。

【裝備】

防御或加乘系嘅道具可以喺遊戲店舖買到，亦有部份 Rare Item 係任務或主角能力值提昇嘅獎勵；另外可以為角色配戴飾品或者更換外觀。對於 Falcom 作品 Fans 黎講，飾品一欄應該會格外有親切感，因為《eX＋》嘅飾品特典正正係《閃之軌跡》最受歡迎嘅幾位角色！

明日香套特典外觀好萌

至於武器方面，玩開《軌跡》系列嘅朋友一定唔會陌生！遊戲繼續沿用 Core 系統，核心 Core 決定角色嘅屬性，而喺核心下面可以配備具有唔同能力嘅 Grids，例如係能力加乘、魔法技、或者係輔助功用好似增加素材掉落率咁。Grids 可以在店舖購買或鍊成，比較珍貴嘅 Grids 就可能要達成某啲條件先會拎到！

與此同時，除咗 Grids 有分 R / SR 之外，其實配備嘅每一格都仲有分等級架！如果格仔得 Lv1就只可以裝備普通等級嘅 Grids了。至於升裝備用嘅素材，後期可以買到，但初期就要大家刷迷宮了～

戰鬥中得到嘅寶石可於現實換錢

遊戲喺地點轉移呢一點做得非常 User Friendly，基本上除咗迷宮入面之外，所有地方都可以用快捷鍵一鍵到位！而地圖本身設計都好清晰易睇，有特別情節嘅地方都用感嘆號標示，紅色係主線、綠色係支線、黃色係角色好感度劇情；操作易到你入 Game Skip 哂佢啲教學說明都無所謂（誤）

支線任務會直接標示在地圖上，簡單到咁你唔係唔做呀？

至於遊戲嘅日常探索……簡單黎講就係一個漫長嘅收集過程！朋友嘅情報要儲、食譜要儲、書本刊物要儲！而部份情報同 Items 仲係有時限性架！所以我花喺收集嘅時間同心機仲多過打迷宮（掩面）

【收集・書類】

喺圖書館或者書店可以定期買到書類雜誌，呢啲書道具除咗揭示咗一啲故事補完之外，有時仲可以幫男主角增加「智」；提提大家嘅係入手咗嘅書本要喺 Items 度選擇「使用」先會計落記錄表架！

【收集・食譜】

同書本一樣可以在各處食店買到，同樣地需要「使用」先會生效。今次遊戲入面可以收集嘅食譜有 20 種，隨住主劇情推進，可以入手嘅料理就越多。

料理分成四種：獨自料理、普通成品、變種料理及失敗料理；每個角色都有自己擅長及苦手嘅料理，點樣可以全料理（20 料理 x 4 種類）稱霸都係遊戲嘅樂趣之一！食物素材可於店舖購買，魔物素材就請大家到迷宮刷啦。如果唔知道邊個魔物會跌咩素材？唔駛擔心，只要你打過嘅怪都會自己入咗電話嘅 Database，可以隨時查看喔！

小空個樣係：你唔係想我煮呢樣吓話？出事架嘛！

【收集・友達資料】

Falcom 嘅遊戲一向好鼓勵玩家周圍同人交流（笑），同朋友或者社區住人交談會得到唔同嘅朋友資料。雖然聽落好似淨係滿足收集控嘅玩法，不過諗深一層其實幾有 Heart 吖，唔單止主角群，Falcom 連路人都幫佢諗埋個性同埋故事，你玩耐咗對得班書友仔耐咗，其實都會不期然產生一份親切感架嘛！

學生會長好有成為御姐嘅潛力，我萌了

【收集・房間擺設】（不設獎盃）

作為一個典型日系動漫設定嘅男主角，洸君當然就係「父母於外國工作，自己今年開始獨居」同時不愁衣食嘅有錢仔啦！你睇吓佢間房仲大過我個廳呀，都唔知佢打工黎做乜。遊戲入面可以收集唔同擺設令你間房豐富啲，不過其實劇情根本無需要你返屋企……

以上提到嘅書類・食譜・朋友、連同魔物資料 Database 如果 100％ 收集都可各得獎盃一個；不過想稱霸朋友同魔物資料就一定要二周目先得……咁你又放心，二周目唔單止重玩一次遊戲咁單調，除咗可以引繼一回目 Save 之外，仲會有衍生劇情同埋新增六個高難度迷宮！不過呢部份牽涉劇透我就唔講太多啦 (´・ω・`)

不過引繼都唔係咩都有哂架，二周目時你可以得到 10 個引繼 Point、三周目就會得到 20 Point，而每個引繼 Item 都會扣除點數！所以如果只打算玩二周目嘅朋友就自己小心揀選想要承繼嘅內容了！

最後不能不提嘅係主題曲……而家所有現代作品似乎都要出一隊自己嘅二次元偶像組合！組合 SPIKA 其實人設 OK 嘅，首歌嘅疾走感我都覺得幾 Match 個遊戲世界觀，不過始終唔係專業一線聲優，五個人合唱把聲都仲係好薄好虛咁……有興趣嘅朋友可以按片試聽 (*ﾟ∀ﾟ*)