【假如你仲未棄坑】說好了的 SINoALICE x NieR: Automata 活動終於降臨

世事嘅嘢……Square Enix 旗下手機遊戲《SINoALICE》主打暗黑系童話設定,加上晨早講定會同同社大熱作品《NieR: Automata》會有合作 Event,所以未開 Game 已經備受注目……

到而家都仲未知/未玩/未買《NieR: Automata》嘅朋友可以按這裡了解更多

點知天氣不似預期,《SINoALICE》今年 6 月開始營運之後,因為登錄人數比預期中多十九幾萬倍,Server 秒死,結果開 Game 往後嘅一個半月,玩家想玩呢個遊戲嘅心情,已經變成「我淨係想入到 Game」之類嘅人生挑戰,所以好多朋友都忍受唔住,含淚棄 Game。

不過,而家個 Game 營運上已經順暢返好多,雖然每次定期維修嘅時間都頗長,但已經唔會再玩玩吓彈 App,而之前激到玩家經常爆血管嘅「食體力入唔到戰鬥」「食石但抽唔到武器」之類嘅問題亦都好似無再發生!如果你仲未棄 Game 而又對 NieR: Automata 好有愛嘅話,就要留意以下消息啦!

 

 

活動期間會出現:
1-Automata 專用劇本
2-抽蛋期間限定:Automata 三位主角(2B、9S、A2)以及 Emiru 職種及專屬武器
3-Automata 遊戲歌曲(BGM)

而活動流程亦好簡單:玩【Automata 專用劇本】獲得【活動金幣】;儲夠一定份量【活動金幣】就可以去交換所換取 Automata 相關道具或其他遊戲獎勵。

 

9S 同 Emiru 會成為遊戲入面僅有嘅男角色(重點錯)

 

另一方面,講咗好耐嘅「公會鬥技場」經歷兩個月嘅……改善之後(喂)
官方亦都宣佈:終於玩得,8 月 3 日開放!不過唔知到時正式實施時會唔會 Lag 呢……

 

未入公會嘅快啲入

 

雖然我本人就無再認真煲呢隻 Game,不過都仲有日日 login 拎石嘅!活動開催嘅話,我應該呢兩日都會開返 Game 玩睇吓咩狀況~至於經歷過開 Game 期間惡夢嘅朋友,或者而家就係你考慮落坑嘅時候啦(笑)

畢竟人設還是很吸引的

 

iOS 下載傳送門

Android 下載傳送門

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章