係琴日播放既 SQUARE ENIX「勇者鬥惡龍夏祭 2017 舞台生放送！」入面突然公布咗《Dragon Quest Builder 2》呢隻 Game 之外仲講埋會同步係 PlayStation 4 同 Switch 上面發行！！SE 你咁出法是咪逼我要買晒2個版本！！

上集個個都以為純係抄《Minecraft》既《DQ Builder》，估唔到出咗黎係出奇地好玩，汲取咗《Minecraft》既優點但係同時亦都加入咗大量既 DQ 元素，最特別既就係每一章都有明確既主線令到玩家唔會漫無目的咁亂起，對好多玩家黎講呢點真係好吸引！

今次出既 2代會更加強化上集既元素，就影片所見可以見到今集主角有得 Dash，另外仲見到有動物跟住，似乎有得玩寵物育成，另外饑餓度變成以百分比黎計算。

建造方面鋤頭可以將土塊鋤到變斜坡，之不過係影片就見唔到有新既建築材料

加入咗潛水同水中地圖，透過滑翔布可以係天空飛 (薩爾達？)，高度亦都放寬為上集既三倍！

水底世界，有得起水中宮殿！正阿！

空中滑翔

鋤爆個池邊就會變成瀑布

而最重要既資訊就係今集將會支援最大 4 人多人遊玩！

劇情方面《DQ Builder》係 DQ 1之後既故事，咁正路《DQ Builder 2》就係 DQ 2之後既故事……咁計法下一集咪係《DQ Builder 11》？

暫時仲未有正式上市日期，而根據上集黎估計 PS4版本應該會有中文版 (但係點解無PSV？)，Switch 版本就…….喂連香港版 Network 都未有，唔好諗太多啦 K？

有興趣既朋友可以睇下片 (大約10分鐘開始)