唔知大家會唔會同我一樣超級期待 Ubisoft 黎緊於 10 月推出嘅遊戲《South Park The Fractured But Whole》？《衰仔樂園》呢套動畫我當然就無集集都睇哂，但係每次睇都笑到撻地，內容 Geek 得黎又會抽盡各界嘅水，當年睇《衰》仲學識唔少爛仔英文添！LOL 所以如果你無睇過就真係走寶啦。
至於遊戲當然亦跟從動畫嘅模式，以下係遊戲介紹影片：
如果有玩過上集《South Park The Stick of Truth》嘅朋友，或者會記得喺你初始遊戲揀「職業」時，如果揀自己係猶太人嘅話，喺遊戲入面就會係咁比人蝦！呢個 Mean 得黎又非常寫實嘅設定，今集都會延續……
首先當然係建立角色先啦…
你係白人個 Game 就會好 Easy，你皮膚越黑，個 Game 就越難玩！唔好講咩歧唔歧視，因為美國境內膚色問題從來都好嚴重，遊戲只不過反映真實啫架咋。
你可能會話：黑又點，難度高咪小心啲打囉！唔係架，所謂嘅難度提升，並唔係指遊戲戰鬥（爛仔打交LOL）難打咗，而係社區啲人會比說話你聽、會比麻煩你、甚至你喺遊戲入面達成咗 Acheivement，遊戲都會將你嘅獎賞優先比咗使用「白人」嘅玩家先！所以，想感受生活嘅殘酷同埋社會嘅不公，就一定要用最黑膚色黎開 Game 啦（誤）
《South Park The Fractured But Whole》今集遊戲抽水都抽得好足，例如包括 DC 及 Marvels 系列嘅Superheroes 題材（遊戲中搵個拎拐杖同埋口吃嘅角色扮 Flash……orz）、亦有搞笑 Game Of Thrones 嘅劇情等等，就算唔係 South Park Fans，如果對美國流行文化有興趣嘅朋友，我都極力推介你玩呢個 Game。
遊戲正式推出日期為 2017.10.19，對應 PS4 / XBox One；雖然遊戲無中文化，不過全部對白都有英文字幕架！唔駛擔心聽唔明啲爛仔英文啦（笑）
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。