【遊戲評測】《Dragon Quest 11》中文版11月11日推出!先行分享無劇透多圖感想

 

《Dragon Quest 11(勇者鬥惡龍 11:尋覓逝去的時光)》日文版都推出咗一段時間,中文版就將於 11.11 推出,唔知大家決定入手遊戲未?定係苦惱緊最近咁多遊戲推出,自己會無時間玩?呢隻遊戲值唔值得玩,不如睇吓我嘅分享再決定~

 

老老實實,我係 FF 派的,所以今次係第一次咁深入地去玩一隻《DQ》;我必須承認,個 Game 係好玩嘅,劇本安排好簡單易明,但起承轉合亦有驚喜;不過,真心,如果想 100% 稱霸呢隻遊戲,絕對非常花心機時間同埋耐性!不過,作為《DQ》系列 31 週年紀念作,好明顯官方真係擺足心機去做呢個遊戲。以下係遊戲各方面嘅評測:)

 

《DQ11》喺動作操控上面做得好細緻,除咗跑跑跳跳之外,隨住地形轉變,玩家都需要以唔同方式探索地圖;不過點樣切換方式就唔駛點用腦嘅,始終個遊戲係主打「咩年紀都啱玩」,所以特別需要注意嘅地方都會 Bling Bling 咁提示。

飛簷走壁無難度!

有啲魔物可以馴服為自己座駕

去到水都當然就要貢多拉(隔壁棚嘅 FF15 都有類似場景 LOL)

點解會變身做魚就唔講,自己玩吖 ♥

要出海

仲有得召喚神獸飛天

 

至於戰鬥方面,《DQ11》用嘅係典型 RPG 即時遇敵系統;無論係戰鬥場景、難度、技巧,官方都做得極有心思;不過,如果你單純想用技巧打哂啲 Boss,恐怕如意算盤打唔響啦!因為隨住劇情推進,敵人就真係會變得更難打,唔單止厚血,而且攻擊會附帶好多輔助效果,例如係凍結、混亂、媚惑等等,一個唔為意就分分鐘 Game Over。

 

無錯,我嘅意思就係:《DQ11》保留咗 RPG 最原始嘅傳統,一定要狂刷 Level 先過到關 orz

角色之間可以出連攜技(唔需要刷好感度 LOL)

有心機發掘地圖嘅,會搵到唔同形態嘅史萊姆(液體、金屬);通常會有多啲經驗值,刷 Level 恩物(不過撞唔撞到都睇緣份…)

遊戲中盤後升 Level 會變得相當慢 orz

 

除咗升 Level,仲要升技能盤,點錯技能嘅可以返《DQ》全能嘅教會洗技,其實呢個設定就無乜嘢唔妥。

 

只不過,總共有八個角色咁多,而每個角色可以使用三~四種武器,所以要點哂所有技能絕對唔容易……每次升 Level 先得幾點技能 pts,升 level 又慢喎!老老實實,我就無咁好心機稱霸全技能啦,如果唔心急、打算慢慢煲《DQ11》嘅朋友,可以挑戰吓呢一項成就 LOL

劇情中盤之後,技能仲會增加添!

除咗刷 Level,仲要刷素材整裝備

「裝備鍊成」作為小遊戲其實幾好玩

 

遊戲中「收集」嘅元素亦佔咗好重比例,嗯……呢部份係就係好花時間,又要儲齊鎖匙開寶藏、又要集齊啲隱藏支線咁樣,連裝備嘅鍊成 Recipe 都係要自己搵返黎架!不過,呢啲細微嘅部份,亦正正係 RPG 好玩嘅精粹之一,係呀我認我犯賤,一邊話無時間玩,一邊又忍唔住做哂啲支線佢 LOL

可以瘋狂擅闖民居搵道具搵錢!

遍佈各地嘅神秘紅色上鎖大門

誘惑主角去按摩嘅 NPC

只有主角先見到嘅精靈又係咩黎?

通常萌萌系嘅嘢之後都會變黑……

 

劇本方面…講太多都驚劇透!我只能夠講,一開始的終結,只係另一個故事的開始;上一個旅程造成嘅遺憾,只要你有心機,話唔定可以時光倒流完美 Happy End!唔好忘記遊戲個名係「尋覓逝去的時光」,呢句說話已經係最大嘅劇透了(笑)

 

《DQ11》個故事相當長,所有角色嘅性格都好鮮明,而大家之間嘅互動亦描寫得非常細膩。雖然成日有人話「FF 走沉重路線;DQ 就走開心路線」;但係,玩完《DQ11》之後,我又唔係好認同!,雖然劇情偶爾會出現搞笑嘅部份,不過遊戲入面不乏令我心痛落淚嘅情節啊 O_Q

 

如果打到 True End 嘅話,亦都算係一個圓滿開心嘅結局嘅……

呢一幕我真係笑到收唔到聲 :0)

 

成個遊戲我覺得最美中不足嘅係:無全語音。係,我知道歷代《DQ》都無配音,但因為之前《DQ無雙》都已經出動到綠川光、水樹奈奈呢個級數嘅聲優黎玩,今次變返正傳(仲要係紀念作)反而無 CV?!嗚吖!

 

認真,我覺得好可惜呀!個故事咁長,無全語音嘅話,玩到中盤刷 Level 衝支線嘅時候,真心有少少單調(就算啲 BGM 係「東京都交響樂團」演奏嘅都係咁話 LOL)!

呢一幕…我只能夠講…啲角色都係盡早練哂 Level 好…去到後期就…(消音)

 

整體黎講,如果你玩《DQ11》並唔急住爆機、有時間慢慢玩嘅,呢隻絕對係一個非常耐玩嘅 RPG(笑)遊戲而家可以推出中文版絕對係好事,玩 RPG 當然要 100% 明哂個故事先好玩架嘛!日文苦手嘅朋友,記得11月11日中文版就正式推出啦!到時記得感受吓《DQ11》帶比你嘅勇者旅程啊~

 

最後送上 Trailer:

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章