日本人喺打機方面真係有福的，好多作品嘅最新作、試玩版都係日本有先！咁當然係可以理解架啦，鬼叫大廠例如 SEGA、Bandai 等等全部都係日本公司咩……講起 SEGA，去過日本或者玩過《人中之龍》嘅朋友，應該都會知道日本嘅 SEGA CLUB 分舖極多，唔少 SEGA 自家遊戲嘅活動同發佈會，都會選址喺 SEGA CLUB 進行！

今日同大家介紹呢個《SCARLET DAWN》係 SEGA 經典打喪屍遊戲《HOUSE OF THE DEAD》系列即將推出嘅最新作品。《HOUSE OF THE DEAD》初登場已經講緊係 1997 年嘅事，不過打喪屍呢個題材就非常長青嘅，無論係美劇《The Walking Dead》或者係黎緊 2018 年推出嘅 PS4 新遊戲《Days Gone》都係以打喪屍作為主題（笑）

《SCARLET DAWN》今次嘅遊戲系統探用「Unreal Engine 4」，有打開機嘅朋友或者對「Unreal Engine」唔會感到陌生，因為唔少出色嘅遊戲都有採用呢套 Engine，例如係《Batman: Arkham Knight》等；所以 SEGA 今次強調要帶比玩家「最真實嘅恐怖體驗」咁話！

不過《SCARLET DAWN》就未正式投入市場，黎緊 1月19日～21日 會喺「セガ秋葉原3号館」進行公眾開放實測測試，如果呢個時期喺東京嘅朋友不妨留意下，去排隊拎張飛仔就可以等玩啦！可以玩幾耐就視乎當日人數而定，玩完嘅朋友幫 SEGA 填返份問卷就可以了。

至於同我一樣「邊有假邊有錢飛日本啊」嘅朋友，唔緊要，呢個遊戲正式投入市場嘅時候，我地會再同大家匯報（笑）

前幾日提過《SEGA 1月16日會有重大消息發表》，都請大家密切留意我地網站嘅公佈呀！